🔆ભગીરથ બ્રહ્મભટ્ટ ~ બાપ સદાને આવો🔆

બાપ સદાને આવો…
અડધોપડધો સંસારી ને અડધોપડધો બાવો

માડી વેરે ચણ મમતાનાં, બાપ પળોટે પાંખો
માની ઓળખ આંસુ આપે, બાપ બને છે આંખો
સૌને દેતો દૂધ ને માખણ પોતે પીતો કાવો
બાપ સદાને આવો….

ધાન ધરાનાં મા ખવડાવે, બાપ બતાવે ચાંદો
ઘરની સામે ઊગતો સૂરજ, કદી ન પડતો માંદો
હાથ હંમેશાં ઊંચો એનો, નહિ દાનીનો દાવો
બાપ સદાને આવો…

કાંટા કંકર વાળી ઝૂડી, કેડી કરતો ચોખ્ખી
જીવની સાથે જીવ ધબકતો, જીવન રીત અનોખી !
ડાળ પાન સૌ લીલાં રાખે મૂળનો એ જ પુરાવો
બાપ સદાને આવો…

માડી મતલબ વ્હેણ નદીનાં, બાપ પીગળતો પ્હાડ
ખેતરનાં રખવાળાં કરતી, ફૂલ કાંટાળી વાડ
પાનખરે પણ ડાળી ભાળી લેતો હરદમ લ્હાવો
બાપ સદાને આવો….

~ ભગીરથ બ્રહ્મભટ્ટ

આજે Father’s Day… વાસ્તવિકતાને સ્પર્શતું ગીત.

🥀દિન વિશેષ : ભરત ભટ્ટ ‘તરલ’, મુસાફિર પાલનપુરી, દેવેન્દ્ર ધમલ🥀 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏આપને દેશ-વિદેશની મજાની કવિતાના અનુવાદો વાંચવામાં રસ છે? જુઓ વિભાગ ‘અનુવાદ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો.🙏 

વતન