🔆ભાવિન ગોપાણી ~ ફળિયામાં આજે🔆

ફળિયામાં આજે મહેંકતી ભીની હવા વહેતી   નથી
પાડોશવાળી    છોકરી   શું  હિચકે   બેઠી   નથી !

તો  શું  થયું  મારી  તરફ  જોયું   નથી   એણે   કદી
એવા ઘણા છે ગામ  જ્યાં  ટ્રેનો  ઉભી  રહેતી  નથી

વરસો  પછી  મળતાં  જ  એ  ભેટી  પડી જે રીતથી
લાગ્યું  મને   વરસો  સુધી  એ   કોઈને   ભેટી  નથી

ઓઢી  હતી  તે  શાલ  મારી  શું  તને  એ  યાદ  છે
એ   શાલ  ને  એ   યાદ  મેં   આજેય  સંકેલી  નથી

તારી જ માફક આગમન એનુંય પણ જાણી શકાય
તારા  વિચારે  કેમ પગમાં  ઝાંઝરી   પ્હેરી    નથી

~ ભાવિન ગોપાણી

યુવાવસ્થાની મધઝરતી અનુભૂતિઓ. કલ્પનો કેવા મજેદાર છે !

‘તો શું થયું મારી તરફ જોયું નથી એણે કદી / એવા ઘણા છે ગામ જ્યાં ટ્રેનો ઉભી રહેતી નથી!’

પોતાની સામે એ ભલે ન જુએ, પણ પોતાનો બચાવ કેવો નિરાળો !

તો ‘એ યાદ અને એ શાલ’ નહીં સંકેલવાની વાત પણ મનને ઝાંઝરની જેમ રણકાવી જાય છે.

બાકી વિચાર તો આમેય ઝાંઝરી પહેરીને જ આવતો હોય છે ને! એ બીજાને સંભળાતા નથી અને એય સારું જ છે!

તદ્દન નવા, તાજા કલ્પનો અને નવીન ઉપમા ઉપમેય લઈને આવતી આ ગઝલ ચીર પ્રતિષ્ઠિત વિષયને તાજગી બક્ષી જાય છે.

@@

🥀દિન વિશેષ : સરૂપ ધ્રુવ, અંજના ગોસ્વામી, પ્રબોધ પરીખ🥀  

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏આપને દેશ-વિદેશની મજાની કવિતાના અનુવાદો વાંચવામાં રસ છે? જુઓ વિભાગ ‘અનુવાદ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો.🙏 

બાળઉછેરમાં કુટુંબ અને સમાજની ભૂમિકા (3)