🔆ભાગ્યેશ જહા ~ ઊંચકી સુગંધ🔆

ઊંચકી સુગંધ એક ઊભું ગુલાબ, એની વેદનાની વાતોનું શું?
કાંટાંથી છોલાતી લાગણી ને સપનાંઓ ઊંઘ છતાં જાગવાનું શું?

સુવાસે પડઘાતું આખું આકાશ
છતાં ખાલીપો ખખડે ચોપાસ.
ઉપવનના વાયરાની લે છે કોઈ નોંધ?
કોણ વીણે છે એકલી સુવાસ?
વાયરો કહે તેમ ઉડવાનું આમ તેમ વાયરાનું ઠેકાણું શું?

ધારો કે ફૂલ કોઈ ચૂંટે ને સાચવે,
ને આપે ને સુંઘે તો સારું.
ધારો કે એક’દીની જિંદગીમાં મળવાનું,
થોડું રખાય તોય સારું.
પણ ઉપવનમાં ઝૂરવાની હોય જો સજા, તો મળવાના ખ્વાબોનું શું?

~ ભાગ્યેશ જહા

IAS અધિકારી અને ગુજરાત સાહિત્ય અકાદમીના અધ્યક્ષ ભાગ્યેશ જહા, સરકારમાં આટલી હદે વણાવા છતાં હૃદયની સંવેદના જળવાઈ રહેવી એ મોટી વાત છે.

ગુલાબ જોઈને માનવીને જે લાગણી ઉદભવે એના કરતાં ક્યાંય જુદું આ કવિ અનુભવે છે. ગુલાબના કાંટાનેય અનેકોએ કોસ્યા છે પણ એ પછીયે ગુલાબની એકલતા કદાચ કોઈએ જોઈ નથી. એણે સુગંધ ઊંચકી છે, ભૌતિક જગતમાં એ સરતાજ છે એટલે જ એની વેદના અજાણી રહી છે. વાયરો ગુલાબની સુગંધને ઝુલાવે એનો ભરોસો નથી. એ તો ક્યાંયનો ક્યાંય વહ્યા કરે અને એટલે જ પોતાની એકલતાને એ કયા ત્રાજવે તોલે ?

નાનકડી જિંદગીમાં કોઈને મળવાનું, સ્વપ્ન બની જતું લાગે ત્યારે એકલતા ઓર ગહરી બની જાય છે અને ઉપવનની વચ્ચે ઝૂરવું એ તો મોટી સજા!    

યાદ આવે જગદીશ જોષી

‘ધારો કે એક સાંજ આપણે મળ્યાં અને આપણે હળ્યાં પણ આખા આ આયખાનું શું ?’

🥀દિન વિશેષ : સરૂપ ધ્રુવ, અંજના ગોસ્વામી, પ્રબોધ પરીખ🥀 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏આપને કવિઓ વિશે જાણવામાં રસ છે? જુઓ વિભાગ ‘સર્જક’.  મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો.🙏 

ઘર