🔆ચંદ્રેશ મકવાણા ~ આમ ડાળે-ડાળમાં🔆

આમ ડાળે ડાળમાં સંચર નહીં
ફૂલની સંગત વધારે કર નહીં

ગામ આખ્ખું ઘેનમાં ડૂબી જશે
તું હવામાં આટલું વિસ્તર નહીં

રોજ ઉઠી એ વધું રંજાડશે
રોજ ઉઠી કોઇને કરગર નહીં

ત્યાં વીતેલો કાળ સુતો છે હજી
લાગણી,તું સ્હેજ પણ ભાંભર નહીં

હારવાનાં મૂળમાં બસ તું જ છે
આંગળી’નારાજ’સામે ધર નહીં

~ ચંદ્રેશ મકવાણા ‘નારાજ’

‘નારાજ’ કવિ કદાચ જગત સામે નારાજ છે (એ વગર આવું ઉપનામ ક્યાંથી!) પણ કાવ્યો એવાં આપે છે કે ભાવક રાજી રાજી થઈ જાય.

પોતાના પ્રિય પાત્ર માટેની કલ્પના કેટલી અનુઠી છે! ફૂલની સંગતથી પ્રિયની સુગંધ એટલી તો ભરપૂર ભરી છે કે ડાળે-ડાળ એનાથી ચેતનવંતી, સુગંધિત થઈ જાય !

અને બીજો શેર તો કાબિલે દાદ ! ‘ગામ આખ્ખું ઘેનમાં ડૂબી જશે, તું હવામાં આટલું વિસ્તર નહીં’ અહીં બીજા એક પણ શબ્દની જરૂર ખરી?

હવે ભાવ બદલાઈ જાય છે અને આવે છે ચિંતન. જેની સામે માથું ઝુકાવીએ એ આપણને વધારે નમાવવા તરફ જ જાય. દબાયેલાને સૌ દબાવે! લાગણીથી આળા એવાં નાયક લાગણીને પણ ચેતવણી આપે છે અને તેય કડવા શબ્દોમાં. ‘ભાંભર નહીં’ જુઓ, અહીં કવિ ‘બોલીશ નહીં’ કે ‘અવાજ ના કરીશ’ એવું કૈંક કહી શક્યા હોત પણ એમણે શબ્દ વાપર્યો છે, ‘ભાંભર નહીં’ લાગણીને પશુ સમાન ગણી લીધી છે. ઠોકરો ખાવાનું આ ફળ હોઈ શકે. અને આ પ્રવાહ છેલ્લા શેરમાં… પછડાટના અનુભવો અને છતાંય ચેતવણી આપવા જેટલી ખુમારી ! વાહ કવિ !   

ગઝલ મજ્જાની થઈ છે પણ પહેલા બે શેરનો જ પ્રસાર કર્યો હોત તો વધુ જામત… તમને કેમ લાગે છે?

*** 

🌸દિનવિશેષ : જોગી જસદણવાળા ભગવાન થાવરાણી🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

વહાલા દાદીમા