🔆સ્નેહી પરમાર ~ એને ખુદની🔆

*તપેલી છે*

એને ખુદની દિશા જડેલી છે
એ પરત કાંઠેથી વળેલી છે

ઠારવાની છે આગ કોઈની
એ જ કારણથી એ તપેલી છે

આગ કરતાંય ભૂખ વસમી છે
એટલું શાસ્ત્ર એ ભણેલી છે

ઠામ ઘસનાર બાઈની સાથે
રોજ છાનું-છૂપું રડેલી છે

ઊંઘતા જોઈ ઘરના સભ્યોને
સાવ ખાલી, છતાં ભરેલી છે

જેમ ચડ્યું’તું કોઈ સૂળી પર
એમ ચૂલા ઉપર ચડેલી છે

~ સ્નેહી પરમાર

પ્રિય ધીરુબહેન પટેલે એક આખો કાવ્યસંગ્રહ આપ્યો છે, ‘કીચન પોએમ્સ’ જેમાં મોટેભાગે કીચન સાથે જોડાતી વાતો, એની સાથે જોડાનારની મનોદશા, વળી કીચન સાથે જોડાયેલી પોઝીટીવ-નેગેટીવ વાતો પણ…. મજા આવે એવો સંગ્રહ છે. રસોડાનાં  વાસણો પર કવિતાઓ લખાઈ હોય એવું ખ્યાલમાં નથી. અહીં આખી મુસલસલ ગઝલ ‘તપેલી’ ઉપર! વાહ ભૈ અને તેય તાત્વિક વાતો, ચિંતનથી ભરેલી!

મત્લાનો શેર જ જુઓ! પોતાની હદમાં રહેવાનું, કાંઠા નહીં તોડવાનું/છોડવાનું તપેલી શીખી છે. એટલે એના કાંઠા વળેલા છે. આખરે એને ઉપાડવાની પણ હોય ને! એની સીમા સરહદ નક્કી છે. અલબત્ત અંદરની ચીજ એના હાથમાં નથી! એનું કામ પેટની આગ ઠારવાનું અને અહીં ‘તપેલી’માં એનો બીજો અર્થ પણ સમજાય છે. તપેલીને ખબર છે કે નથી પણ કવિએ અહીં સજીવારોપણ કર્યું છે. આગ કરતાં ભૂખ વસમી છે! અને એનું શાસ્ત્ર તપેલી જાણે છે!  સુખ-દુખ હોય તપેલીને? હવે જ્યારે કવિએ એમાં જીવ રેડ્યો છે તો હોય જ ને! શંકા કરવાનું કોઈ કારણ નથી !  અને આમ…. દરેક બાબત! પણ વાંચવાની મજા પડે એ નક્કી !

આ વાંચ્યા પછી ‘તપેલી’ને જોવાની તમારી દૃષ્ટિ બદલાઈ જશે એય નક્કી ! પુરુષ ભલે એ ખાલી છે કે ભરેલી, ભલે એટલું જ જુએ, સ્ત્રી એને પછાડશે નહીં ! કામવાળી બાઈ ઘરની વાત જાણે એ ખોટું !!!!!  

***

🌸દિનવિશેષ : રન્નાદે શાહ, મનીષ પાઠક ‘શ્વેત’, નીલેશ રાણા, હરબંસ પટેલ ‘તન્હા’🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

બાળઉછેરમાં કુટુંબ અને સમાજની ભૂમિકા (1)