🔆પરબતકુમાર નાયી ~ સ્પર્શની🔆

*કેફ છે*

સ્પર્શની મોંઘી મતાનો કેફ છે,
આજ પણ એ ટેરવાનો કેફ છે.

હોઠ મલકાયા અને છલકાય આંખ,
કંઈ નથી, આ ચાહવાનો કેફ છે

એને બાજી જીતવાનો કોડ બહુ,
અમને બાજી હારવાનો કેફ છે.

રહી અધૂરી, પણ રહી ગઈ શ્વાસમાં,
એક અધૂરી વારતાનો કેફ છે.

ગાલમાં ખંજન, ગુલાબી હોઠ છે,
એ ન પૂછો, શાનો શાનો કેફ છે ?

~ પરબતકુમાર નાયી

કેફ, નશો (કોઈ પરિસ્થિતિનો, પીણાનો નહીં) માનવીને જીવાડે છે. સમય પ્રમાણે, અવસ્થા પ્રમાણે, ઉંમર પ્રમાણે કેફ બદલાય છે પણ કશાકનોય કેફ જીવન જીવવા જેવું બનાવે છે.

આ ગઝલનો કેફ પ્રેમની અવસ્થાનો છે અને મોટાભાગે એ લોકોએ ક્યારેક ને ક્યારેક અનુભવેલી હોય છે….

બાળપણમાં મસ્તી-તોફાનનો કેફ, યુવાનીમાં પ્રેમનો કેફ, પછીથી કેરિયરનો કેફ, કમાવાનો કેફ, પ્રૌઢાવસ્થાએ નામ-યશનો કેફ અને ઢળતી વયે કદીક આશા-નિરાશામાં ઝૂલવાનો તો કદી સત્સંગનો કેફ…… આ સંદર્ભમાં કેફને પીણાનાં કેફ સાથે સરખાવી શકાય.

કવિને પૂછો કે કયા કેફમાં કવિતા લખે છે? કમાણી ન હોવા છતાં કવિતા લખવા રાતોના ઉજાગરા શા માટે કરે છે ? આમ જ કોઈ વાર્તાકાર, સાહિત્યકારને……

હાથમાં કરતાલ લઈને નરસિંહ મહેતાએ કે મીરાંએ જે ગાયું એ કેફ વગર સંભવી જ ન શકે.

આ કેફ જે અંદરનો આનંદ આપે છે એનો કોઈ જોટો નથી.

શું સૌ આવા કોઈ કેફમાંથી પસાર થયા હોય છે? ના, કેટલાક લોકો બહુ સપાટ રીતે જીવી જાય છે…. પણ એવાનું આપણે શું કામ?

**    

🌸આજે જન્મદિન: ભાવિન ગોપાણી, દ્વારકેશ વ્યાસ, હસમુખ અબોટી ‘ચંદન’🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏