🔆ગૌરાંગ ઠાકર ~ કદાચ કાલે🔆 -

કદાચ કાલે તમારે માથે, પડે જગતને ઉઠાડવાનું, પ્રભુ તો લાંબી રજા ઉપર છે.
ધરાથી લઈને ગગન સુધીનું, તમારે અંધારુ ખાળવાનું, પ્રભુ તો લાંબી રજા ઉપર છે.

કળી કળીને ફૂલો બનાવી, સુગંધ એમાં પછી ઉમેરી, અને તમારે ઉપરથી અહીંયા,
બધાં જ પંખીની ચાંચ માટે, કશુંક ચણવા ઉગાડવાનું, પ્રભુ તો લાંબી રજા ઉપર છે.

સૂરજ સમયસર ઉગાડવાનો, અને સમયસર ડૂબાડવાનો, નહીં કરો તો નહીં જ ચાલે,
અને બીજું કે તમારે સાંજે, ગગનને રંગોથી રંગવાનું, પ્રભુ તો લાંબી રજા ઉપર છે.

દરેક બાળકનાં સ્મિતમાં જઈ, દરેક માતાની આંખમાં રહી, તમારે હાજર થવું જ પડશે,
પછી તમારે બધાંની અંદર, વહાલ થઈને રહી જવાનું, પ્રભુ તો લાંબી રજા ઉપર છે.

પ્રથમ તમારે હવા ને અહીંયા, બનાવવાની છે શ્વાસ સૌનો, પછીથી શ્રધ્ધા જીવાડવાની,
તમે જ બોલો થશે, બધું આ, નહીં તો છોડો પ્રભુ થવાનું, પ્રભુ તો લાંબી રજા ઉપર છે.

~ ગૌરાંગ ઠાકર (13.4.1965)

‘પ્રભુ તો લાંબી રજા પર છે’ જેવી લાંબી રદ્દીફ લઈને આવેલા કવિ ગઝલમાં ખૂબ ઊંડી વાત કરે છે.

માનવી – આસ્તિક, નાસ્તિક, અને અહંકારી.
આસ્તિક સહજ છે. એને દેખાશે, ઈશ્વર ક્યાં ક્યાં સમાયેલો છે! અને એ અભિભૂત થશે….
નાસ્તિક પણ સહજ છે, એ એની માન્યતાને વળગી રહેશે. ‘ઈશ્વર જેવું કંઈ નથી.’

સૌથી અઘરો પ્રકાર અહંકારીનો.
એ પોતાને જ બધું સમજે. એની આગળ કોઇની મહત્તા નથી. એનો ‘હું’ એટલો વિશાળ અને બળવાન કે એની આગળ દુનિયા જખ મારે! અલબત્ત આ એની માન્યતા જ.

કવિએ આવા લોકોની ઠેકડી ઊડાડી છે. છેલ્લી પંક્તિમાં, ‘તમે જ બોલો થશે, બધું આ, નહીં તો છોડો પ્રભુ થવાનું, પ્રભુ તો લાંબી રજા ઉપર છે’

અલબત્ત સારું છે કે ઈશ્વર કદી રજા પર જતા નથી કેમ કે ઈશ્વર કોઈ માનવ નથી. એ અનંત શક્તિ છે, જે અવિરત પોતાનામાં સ્થિર છે. એને ક્યાંય નથી જવાનું, નથી આવવાનું. એ એક વિરાટ અસ્તિત્વ છે જેની અંદર આખું બ્રહ્માણ્ડ પોતાની ગતિથી ચાલ્યા કરે છે. આ વિષય જ અનન્ય છે. આવા સરસ વિષયને લઈને કવિને આ ગઝલ રચવા માટે હૃદયથી અભિનંદન આપું છું.

🌸જન્મદિન: જ્યોતિ હિરાણી, ઉર્વીશ વસાવડા, ગૌરાંગ ઠાકર * મનહર ‘દિલદાર’, ભોગીલાલ સાંડેસરા🌸

🙏 આપનો જન્મદિન (વિભાગ ‘વિશેષ’) પણ અહીં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં પસંદના કવિની કવિતા મળી શકે છે, કવિનું નામ લખો search માં, પોસ્ટ હાજર! 🙏