🔆મનહર દિલદાર ~મને કોઈ🔆 

મને કોઈ નથી જાતું લઈ એની હવેલીમાં,
મૂંઝારો કેમ ના આવે રે! આની આ જ ડેલીમાં?

કથા કાલે કહી’તી તે તમે આજે નહીં કરશો,
નવીનમાં જે મઝા પડશે નહીં પડશે કહેલીમાં.

મને એ બીક લાગે છે ખચિત ઉજાગરો નડશે,
જરા હું આંખ મીંચી લઉં, જરી રજની વધેલીમાં.

ઘણી વેળા રમી છે એ, રમતમાં શું અરે! રમવું?
ન જાણે રસ પડે છે શું? રમત એવી રમેલીમાં.

ન, જાણે જીવ કેવો છે, આ ચંચળ ચંચરીક જેવો!
ઘડી જીવ જાય પેલીમાં, ઘડી જીવ જાય પેલીમાં.

હતું અભિમાન બહુ સૌને, ગયું અભિમાન ક્યાં સૌનું?
ઢળી ગઈ આખી મહેફિલ, એમની આંખો ઢળેલીમાં.

એ, મારા ભાગ્યની સાકી, સુરા દેજે ગમે તેને,
મને કૈં રસ નથી, એવી સુરા બાકી રહેલીમાં.

જીવનમાં રંગ બસ રૈ જાય એવો રંગ ચાહું છું,
બીજા લાખો ભલે રેલાય રંગો રંગરેલીમાં.

મને ‘દિલદાર’ તારા સમ, મળ્યું ના, કોઈ તારા સમ,
નિખિલ શોધી વળ્યો સૃષ્ટિ હું બ્રહ્માની ઘડેલીમાં.

~ મનહર દિલદાર (મૂળ નામ : મનહરલાલ લક્ષ્મીશંકર રાવલ 13.4.1927 – 7.9.2014)

ગઝલસંગ્રહ ‘આઠો જામની દિલદારી’

@@

🌸જન્મદિન: જ્યોતિ હિરાણી, ઉર્વીશ વસાવડા, ગૌરાંગ ઠાકર * મનહર ‘દિલદાર’, ભોગીલાલ સાંડેસરા🌸

🙏 આપનો જન્મદિન (વિભાગ વિશેષ) પણ અહીં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં પસંદના કવિની કવિતા મળી શકે છે, કવિનું નામ લખો search માં, પોસ્ટ હાજર! 🙏