🔆પ્રતિભા ગજેરા ~ જ્યારે જ્યારે 🔆

જ્યારે જ્યારે હું ઘરખર્ચનો હિસાબ કરું છું
ત્યારે લાગે છે કે હું એક રાજ્ય ચલાવું છું.
જ્યારે હું રસોડામાં રાંધવા ભરાઈ જાઉં છું
ત્યારે લાગે છે હું એક મહાન શેફ છું.
જ્યારે હું ઘરના માંદા સભ્યોને સંભાળું છું
ત્યારે લાગે છે કે હું સારી ડોકટર છું.

જ્યારે હું બાળકોને ભણાવું છું
ત્યારે લાગે છે કે હું સારી ગુરુ છું
જ્યારે હું છોકરાઓના ચિત્રોમાં રંગ પૂરું છું
ત્યારે લાગે છે કે હું સારી ચિત્રકાર છું.
જ્યારે હું મનની વાત કાગળ પર લખુ છું
ત્યારે લાગે છે કે હું સારી લેખિકા છું  

પણ
જ્યારે જ્યારે પતિ સામે આવે છે

ત્યારે લાગે છે કે હું માત્ર પત્ની છું
અને
બધાં જ ખિતાબો ખરી પડે છે…..

~ પ્રતિભા ગજેરા

દિવ્ય ભાસ્કર @ કાવ્યસેતુ 265 @ 27 ડિસેમ્બર 2016 * લતા હિરાણી

આખી કવિતામાંથી પસાર થયા પછી આ બાબતે તમે સમ્મત થશો કે સાવ સામાન્ય લાગતી શરૂઆત અંતે મનમાં ચચરાટ થાય એવી ચોટ આપી જાય છે, એ જ એનું કલાતત્વ. સ્ત્રીઓ આ કવિતા ખૂબ સારી રીતે સમજી શકશે.  

એક ગૃહિણી સાચે જ એક રાજ્ય ચલાવતી હોય છે. ઘરના હિસાબકિતાબથી માંડીને મહેમાનોની સરભરા સુધીના બધા જ ક્ષેત્રો એ સરસ રીતે નિભાવતી હોય છે. મા પાસેથી જે શીખીને આવી અને એમાં પોતાના અનુભવો અને સમય સંજોગોએ જે ઉમેર્યું એ એનું ભાથું. ઘર ચલાવવા માટે એણે કોઈ અભ્યાસક્રમ કર્યો નથી હોતો કે નથી હોતી કોઈ વ્યાવસાયિક તાલીમ પણ તેમ છતાંયે આ બધુ સહજરીતે નિભાવવું એ સ્ત્રીના લોહીમાં વહેતું હોય છે. સંભાળ લેવાનું એને લગભગ શીખવવું નથી પડતું. નાનકડી દીકરીના વર્તનને જોશો તો આ તરત સમજાઈ જશે.

અહીંયા મોટા ભાગની સ્ત્રીઓ અનુભવતી હોય એ ભાવ આરોપાયા છે. કેટકેટલા રોલ કુશળતાથી ભજવતી સ્ત્રીની કદર એના પતિને કેટલી હોય છે ?
“પણ, જ્યારે જ્યારે પતિ સામે આવે છે, ત્યારે લાગે છે કે હું માત્ર પત્ની છું અને બધાં જ ખિતાબો ખરી પડે છે…..”
આટલા શબ્દોમાં કવયિત્રીએ કેટલું બધુ કહી દીધું છે ! ઓફિસમાં પ્રમોશન માટે ટળવળતા કે વખાણના શબ્દો સાંભળવા માટે બોસને મસકા મારતા અથવા એકાદ નાનકડા ખિતાબ માટે ગૌરવથી ફુલાતા પતિને સ્ત્રીના કામને કે એની એકાદ કુશળતાનેય બિરદાવવાની જરૂર નથી લાગતી. પ્રશંસાના બે શબ્દો સાંભળવા સૌને ગમે છે, સ્ત્રીઓ એમાંથી બાકાત કેમ હોઈ શકે ? પણ મોટેભાગે એણે પોતાની પીઠ જાતે જ થાબડી લેવાની હોય છે. અને એ પછી યે,
“આખો દિવસ તું કરે છે શું ? આટલુંય તારાથી ન થાય ?”
આ શબ્દો કેટલીય ગૃહિણીઓએ અનેકવાર સાંભળ્યા હશે. દિવસભરના કામથી થાકેલી પત્ની પાસેથી પણ કેટલાય પતિ એના ‘દામ્પત્યજીવનના હકો’થી વંચિત ન રહી શકે, એય એક જુદી વાસ્તવિકતા છે. વોટ્સ એપના જોક્સમાં વારેવારે વગોવાતી સ્ત્રી એ પુરુષોના ભેજાની પેદાશ છે. સચ્ચાઈ આ કવિતામાં લખાયેલા શબ્દોની આજુબાજુ, ઉપર-નીચે જીવે છે ! બાકી અપવાદ તો બંને પક્ષે હોય.

🙏આજનો દિનવિશેષ : શબનમ ખોજા, હેમેન શાહ, ચેતન મોદી, દેવેન્દ્ર પાળેજા ‘ઉશના’ – *મનુભાઈ ત્રિવેદી ‘સરોદ’(*અવસાનદિન)🙏

🙏 નોંધ: કવિઓના જન્મદિવસોનો વિભાગ છે ‘વિશેષ’ અને ‘કાવ્યવિશ્વ’ પર આપ ગમે ત્યારે જોઈ શકો છો. like, પ્રતિભાવ પણ આપી શકો છો. આભાર. આપના નામથી ‘search’ આપો, હાજર.🙏

🙏કાવ્યવિશ્વ’માં કવિના નામથી, કાવ્યની પ્રથમ પંક્તિથી અને વિષયથી કાવ્ય કે લેખ શોધી શકાય છે જુઓ search, હાજર.🙏

🙏સૂચના પ્રમાણે ના મળે તો જાણ કરવા વિનંતી. 🙏