🔆ઝવેરચંદ મેઘાણી ~ અમે ચાંદો સૂરજ🔆

અમે ચાંદો સૂરજ રમતા’તા,
રમતાં રમતાં કોડી જડી !

કોડીનાં મે ચીભડાં લીધાં,
ચીભડે મને બી દીધાં !

બી બધાં મે વાડમાં નાખ્યાં,
વાડે મને વેલો આપ્યો !

વેલો મેં ગાયને નીર્યો,
ગાયે મને દૂધ આપ્યું !

દૂધ મેં મોરને પાયું,
મોરે મને પીછું આપ્યું !

પીંછુ મેં બાદશાહને આપ્યું,
બાદશાહે મને ઘોડો આપ્યો !

ઘોડો મેં બાવળિયે બાંધ્યો,
બાવળે મને શૂળ આપી !

શૂળ મેં ટીંબે ખોસી,
ટીંબે મને માટી આપી !

માટી મેં કુંભારને આપી,
કુંભારે મને ઘડો આપ્યો !

ઘડો મેં કૂવાને આપ્યો,
કૂવાએ મને પાણી આપ્યું !

પાણી મેં છોડને પાયું,
છોડે મને ફૂલ આપ્યાં !

ફુલ મેં પૂજારીને આપ્યા,
પૂજારીએ મને પ્રસાદ આપ્યો !

પ્રસાદ મેં બાને આપ્યો,
બાએ મને લાડવો આપ્યો !

એ લાડવો હું ખાઈ ગ્યો,
ને હું આવડો મોટો થઈ ગ્યો !!

~ ઝવેરચંદ મેઘાણી

કેટલી પોઝિટિવિટી આ ગીતમાં ભરી છે ! આવડી મોટી શીખ કે કોઈને આપવાથી જ મળે છે. સારું આપો અને સારું મળે !
ધન્ય હો કવિ !

@@

આજનો દિનવિશેષ : દક્ષા સંઘવી, મનોહર ત્રિવેદી, સતીન દેસાઇ ‘પરવેઝ’ – જયંત પારેખ, કિસાન સોસા ‘અનામય’, ડાહ્યાભાઇ પટેલ ‘માસૂમ’, માયા એન્જેલૂ અને *ખલિલ ધનતેજવી,  *માખનલાલ ચતુર્વેદી, *અજ્ઞેય’ (સચ્ચિદાનદ હીરાનંદ વાત્સ્યાયન), કુંદનલાલ સહગલ (*અવસાન તારીખ)

🙏 નોંધ: કવિઓના જન્મદિવસોનો વિભાગ ‘વિશેષ’ ‘કાવ્યવિશ્વ’ પર આપ ગમે ત્યારે જોઈ શકો છો. like, પ્રતિભાવ પણ આપી શકો છો. આભાર. આપના નામથી ‘search’ આપો, હાજર.🙏

🙏કાવ્યવિશ્વ’માં કવિના નામથી, કાવ્યની પ્રથમ પંક્તિથી અને વિષયથી કાવ્ય કે લેખ શોધી શકાય છે જુઓ search, હાજર.🙏

🙏સૂચના પ્રમાણે કશું ના મળે તો જાણ કરવા વિનંતી. 🙏