🥀ઋષિ દવે ~ રોક્યું ન રોકાયું🥀 -

*આંસુ*

રોક્યું ન રોકાયું….
એક આંસુ
કરેલી કેટલીય આજીજી
અને
હજારો પ્રયત્નો બાદ
આંસુએ પડવાની તૈયારી બતાવી
અને જાણે મા
દિકરીને દરવાજા સુધી
વળાવવા તૈયાર થાય,
પછી
એ દરવાજો વળાંક સુધી લંબાય
ને એમ
આંખો
આંસુ ને વળાવવા તૈયાર થઈ
છેક……
ડુસકાં સુધી ……

~ ઋષિ દવે

ઝળઝળિયાંથી ડૂસકાં સુધીની યાત્રા. પણ આ યાત્રા એટલી કલામય શૈલીથી આલેખાયેલી છે કે જાણે આંસુની વાર્તા વાંચતાં હોઈએ અને ક્લાઇમેક્સમાં ડૂસકાં આવે એવી અનુભૂતિ છે. આંખ, આંસુ અને ડૂસકાનું જીવંત, અસરદાર આલેખન.

અહીં એ પણ યાદ આવે કે નાનકડી દીકરી એના નાનકડા હાથની નાનકડી આંગળીઓ વડે પિતાની આંખ દાબે કે માથા પર હાથ ફેરવે એ દૃશ્ય વિશ્વનું ઉત્તમ દૃશ્ય છે અને એ સ્પર્શ ભલભલા પિતાની આંખમાં હર્ષાશ્રુ લાવે એવો હોય છે. જો માણતાં આવડે તો એના જેવું સુખ બીજા કશામાં નથી હોતું.

🙏🏻માફ કરશો મિત્રો, ‘કાવ્યવિશ્વ’માં કાવ્યસંગ્રહો લેવાના બંધ કર્યા છે. આભાર.🙏🏻