🥀મુકેશ દવે ~ ચકલી તારાં🥀 -

ચકલી તારાં ચીંચીંકઢા ચકલીવેડાં મેલ,
માણસની જાત જેવા ખેલવાના થાય હવે, રોજરોજ નવાનવા ખેલ……

ખીંટી ને ગોખલા લીસીલસ્સ ભીંત, ને આભલાંને ઓરડે પૂર્યા,
હારબંધ બેઠેલી છબીઓના દેવતાઓ, પોટલે બંધાઈને ઝૂર્યા,
તોરણ ને કૂંડામાં ઝૂલવાના ઓરતાને હળવેથી પાછાં ઠેલ…..

ચોખાના દાણાં હવે વારતામાં ગૂમ ને, થયા બાજરા કપાસના પૂમડાં,
ઝાડવાની જાત એવી વંઠેલી નીકળી, કે બંગલા બની છે રૂપકડા,
આબરૂને ચીરીને શીદને ત્યાં ન્હાવું ! ઓલી માટી ડામરની રખેલ….

~ મુકેશ દવે

ચકલીના નામે માણસજાત પર તીવ્ર કટાક્ષ.

આ ચકલી કાવ્ય પણ આપને વાંચવું ગમશે.