🥀હર્ષા દવે ~ ચકલી કાચી  પોચી🥀

ચકલી કાચી  પોચી  ચાંચુડીને  કાઢે ચકમક ધાર..
ચકલી ઘણી ખમ્મા!
ચકલી આંધીના ઓછાયામાંથી નીકળી ગઇ છે બ્હાર..
ચકલી ઘણી ખમ્મા!

ચકલી સૂરજ સામે જોતી..
ચકલી   ઊડે   બેડી  સોતી..
ચકલી ચાંદ ઉપર જઈ લીંપી આવે ઓકળિયાળી ગાર..
ચકલી ઘણી ખમ્મા!

ચકલી ભૂખનો ભારો બાંધે..
ચકલી  ફાટ્યું તૂટ્યું   સાંધે..
ચકલી માભો એવો રાખે જાણે મોટ્ટા ઘરની નાર..
ચકલી ઘણી ખમ્મા!

ચકલી ઓછું-વત્તું સાંખે..
ચકલી પલ્લું નમતું રાખે..
ચકલી હળવે રહીને ઉપાડી લે આખ્ખાં નભનો ભાર..
ચકલી ઘણી ખમ્મા!

~ હર્ષા દવે

ચકલી અહીં માત્ર પ્રતીક છે. ચકલીનાં નામે કોની વાત છે સમજાઈ જશે…..

🙏🏻માફ કરશો મિત્રો, ‘કાવ્યવિશ્વ’માં કાવ્યસંગ્રહો લેવાના બંધ કર્યા છે. આભાર.🙏🏻