🥀રીના પરીખ ~ તેં રણપ્રદેશમાં🥀 -

તેં રણપ્રદેશમાં નદી વહેતી કરી પછી,
મેં કાચઘરની માછલી વહેતી કરી પછી.

વાતાવરણમાં સાવ નીરસતા ભરી હતી,
સારું થયું તેં હાજરી વહેતી કરી પછી.

વરસાદ આવતાં જ હું બાળક બની ગયો,
કાગળની એક નાવડી વહેતી કરી પછી.

પ્રત્યેક વાતે તેં જો કિનારો કરી લીધો,
તો મેંય મારી લાગણી વહેતી કરી પછી.

સંબંધ ના રહ્યો ભલે, મીઠું સ્મરણ હતું,
બાળી નહીં મેં ડાયરી વહેતી કરી પછી.

લાગી રહ્યો’તો ભાર હવાનેય આજ તો,
મેં યાદ તારી સામટી વહેતી કરી પછી.

વૈદ્યે કહ્યું કે રક્તમાં ખૂટે છે કંઈક તત્વ,
નસનસમાં તારી મેં છબી વહેતી કરી પછી.

પહેલાં લગાવી ડૂબકી છલકાતી આંખમાં,
દરિયા વિશેની બાતમી વહેતી કરી પછી.

આખી સભા છે સ્તબ્ધ, અવાચક અને ચકિત,
તારી કથા તેં આગવી વહેતી કરી પછી.

~ રીના પરીખ

ગઝલ, શબ્દોમાં વહેતી વહેતી ભાવકના મનમાં પણ વહેવા લાગે છે.

નીરસ વાતાવરણમાં હાજરી વહેતી કર્યાનું કલ્પન કેવું મનમોહક છે! કવયિત્રી છે પણ કાવ્યરચનામાં નાયિકાને બદલે નાયક છે! એ નોંધપાત્ર ખરું જ.

કેવો મધુર લાગે છે આ શેર ! “સંબંધ ના રહ્યો ભલે, મીઠું સ્મરણ હતું / બાળી નહીં મેં ડાયરી વહેતી કરી પછી.”

તો આ પણ જરા હટકે ખરો ! “વૈદ્યે કહ્યું કે રક્તમાં ખૂટે છે કંઈક તત્વ / નસનસમાં તારી મેં છબી વહેતી કરી પછી.”

આ સિવાય ગમેલા અન્ય શેરો

કર્યું છે આંખમાં સ્થાપન, તમારે આવવું પડશે. / છે આ આંસુનું ઉદઘાટન, તમારે આવવું પડશે.

શુકન જોઈને બેઠો છું, તિલક કરવાનું બાકી છે / બનીને બસ હવે ચંદન તમારે આવવું પડશે.

રીના પરીખ * ‘મનોમન’ ગઝલસંગ્રહ * ઝેન ઓપસ 2026

ખાસ નોંધ : જે ઓલરેડી આવી ગયા છે એ લઈ લેવાશે પરંતુ હવે,

‘કાવ્યવિશ્વ’માં કાવ્યસંગ્રહો લેવામાં આવતા નથી. આભાર.

Saryu Parikh

18/03/2026 at 6:48 pm

સરસ રચના.
સરયૂ પરીખ.

છબીલભાઈ ત્રિવેદી

19/03/2026 at 9:26 am

ખુબ સરસ રચના ખુબ ગમી આસ્વાદ લેખ મજાનો

Kavyavishva
20/03/2026 at 11:29 am

આપને આસ્વાદ ગમ્યો, આભાર છબિલભાઈ.

Loading...

'સાજ' મેવાડા

19/03/2026 at 11:59 am

કવયિત્રી રીના જી, ખૂબ જ સરસ ગઝલ. આપે ખૂબ સરસ રીતે ઉઘાડી આપી.

Kavyavishva
20/03/2026 at 11:29 am

આપને આસ્વાદ ગમ્યો, આભાર મેવાડાજી.

Loading...

Reena Parikh

20/03/2026 at 3:30 pm

નમસ્કાર 🙏🏻
મારી ગઝલને અહીં સ્થાન આપવા બદલ આપનો હૃદયપૂર્વક આભાર!

ખૂબ સુંદર આસ્વાદ!💐
બહુ ગમ્યો.

તથા આ ગઝલ માટે મળેલ. પ્રતિભાવ પણ ખૂબ સરસ!💐💐
સૌનો ખૂબ આભાર🙏🏻

આદરણીયા લતાબેન હીરાણી
આદરણીયા સરયૂજી પરીખ
આદરણીય છબિલભાઈ ત્રિવેદી
આદરણીય મેવાડા સર

આપ સૌનો હ્રદયપૂર્વક આભાર!🙏🏻💐

🥀રીના પરીખ ~ તેં રણપ્રદેશમાં🥀