🔆ભાગ્યેશ જહા ~ સ્વાગત છે🔆 -

*સ્વાગત છે સ્વામી….*

હે ભગવાન સૂર્ય
મન હજી ઊંઘમાં આળોટે,
ત્યાં જ તારો પગરવ સંભળાય, મારા નાથ !

સહેજ ઓઢણ આઘું કરીને
નીરખું,
સપનાનું અંગરખું સીધું કરી,
નજરની બારી હળવેકથી ખોલું,
ને તું જ સઘળે છલકાય, મારા મિત્ર !

મારી જેમ જ અંધારાનું ઓઢણ
આઘું કરતી પૃથ્વી,
બગાસું ખાતું નજીકનું આકાશ
સપનાંના અવશેષો ખંખેરતાં વૃક્ષો,
કોઈ રાજકુમારીની અઢળક તિજોરીની જેમ
ખૂલી રહેલી ક્ષિતિજો,
આજ તારી અસીમ કૃપા વરસવાની છે,
બધે જ લહેરાઈ રહ્યા છે તારા ધ્વજ,
સ્વાગત છે સ્વામી.

~ ભાગ્યેશ જહા

આને સૂર્યોપાસના કહી શકાય ? હા. આ એક અદના માનવીની સૂર્યપ્રાર્થના છે જેણે પોતાની ઊંઘવાની ઈચ્છા પર કોઇ અસ્વીકારનું ઓઢણ નથી રાખ્યું! સપનાંમાં વિહરતા મનને પણ સ્વીકાર્યું છે. અંદર રહેલી ચપટી આળસને વાદળની જેમ વિહરવાની અનુમતિ પણ આપે છે કેમ કે એ જાણે છે કે આળસ આપોઆપ અનંતમાં વિલાઈ જવાની છે ! આ બધાના હોવા છતાં એ સૂર્યની ભવ્યતા અને દિવ્યતા પ્રાર્થી છે! સૂર્યના આગમનની અનિવાર્યતા સમજવાની દૃષ્ટિ એની પાસે છે.

બગાસું ખાતું બાજુનું આકાશ એને બાજુનો સંસાર કહીશું? બગાસું ખાતા ખાતા પોતાનાં શરીરથીયે અળગા રહી શકાય !

જેની નજરની, દૃષ્ટિની બારીઓ ખૂલી ગઈ છે એને મળવાનો છે અઢળક અઢળક પ્રકાશનો, જીવનનો વૈભવ. સૂર્યદેવને તો બસ આપવું છે, ઝીલાય એટલું ઝીલો……. પૃથ્વી, આકાશ, વૃક્ષો અને ક્ષિતિજોના રૂપકોમાં ચેતનાનો સંચાર કેવો છલકાય છે!