🔆કૌશલ યાજ્ઞિક ~ લલિત તપતા🔆 -

શિશિર તડકા ( હરિણી)

શિશિર તડકા
લલિત તપતા હૂંફાળા શા થયા ઉડતા નભે
રમણ કરતાં તાજા તાજા પ્રભા લઈ નિતર્યા
નિજ મગનમાં આલિંગે જ્યાં ધરા પીગળી રહે

શિશિર તડકા
નિજ વરણના કૂણા કૂણા કરે સ્પર્શ વૃક્ષને
વિટપ વિટપે મોતી કેરાં સજે બુંદ ઓસના
વિન પરણની, ડાળે જાણે ધરે નવ વસ્ત્રને

શિશિર તડકા
હિમ શિખરને સ્પર્શે એવે ઝરો નિતરી રહે
કલલ કરતાં વ્હેતાં પાણી મહીં તરતો ફરે
ચમક ચમકે મેદાનોના વસી તૃણ રેતમાં

શિશિર તડકા
ઉજળા ઉજળા ફેલાઈ ને વસે ફળિયા મહી
મૃદુલ અગને અંગે તાપે, હરે મન, તાપણી.
મખમલ તણી મીઠી લેપે અહો નવ તાજગી

શિશિર તડકા
કણ કણ મહીં ઉજાસીને ધરે નવ ચેતના
રવિ રસ તણો પીગાળીને ધરે શુભ્ર આસવ
અવની ઉપરે રેલી રેતો સુધા માય પ્યાલીઓ

~ કૌશલ યાજ્ઞિક

આ કવિ મને એટલા માટે ગમે છે કે ગઝલના ધસમસતા પૂરમાં એ સંસ્કૃત છંદોની નાવ લઈને તરે છે. એય એકલદોકલ નહીં અનેક કાવ્યો સરજ્યા છે એમણે. શુદ્ધ છાંદસ કાવ્યોનો એક પૂરો સંગ્રહ ‘આતિથ્ય’ એમણે આપ્યો છે. વળી નવા નવા વિષયોને તેઓ છંદમાં પ્રયોજે છે.

અહીં જુઓ, ‘હરિણી’ છંદમાં શિશિરના કુમળા તડકાને એમને કેવી મજાની રીતે આવકાર્યો છે….