🔆મધુમતી મહેતા ~ સોનેરી ઈચ્છા🔆 -

સોનેરી ઈચ્છાના ઊછળે સાત સમંદર,
ના હોડી ના ઓવારો કે ના કોઈ લંગર.

પથ છોડી, પદ્માસન વાળી દેખો મંજર,
જે બહારે છે એ જ બધું છે અંદર અંદર.

સાત સૂરોની ચિંતા સઘળી છોડી દઈને,
એક જ સૂર અંદર રોપીને છેડો જંતર.

મનનું અગડંબગડં સરખું સમજી લેવું,
ત્યાર પછી રટવો બેસીને કોઈ મંતર.

આતમજળમાં આગ અલખની પ્રગટાવી જો,
એની મેળે છૂટશે તાવીજ, માળા, મંતર.

તારા ડમડમ ઢોલ-નગારાં રહેવા દે તું,
દરવાજે ગોરખ આવ્યો છે, ચેત મછંદર….

~ મધુમતી મહેતા

આધ્યાત્મિકતાનો સ્પર્શ લઈને આવતી ગઝલ.

અમાપ, અફાટ ઇચ્છાઓ પાસે સાત સમંદર પણ ઓછા જ પડે. જે છે એ અંદર છે, જોવાનું અંદર છે, જવાનું અંદર છે. શાંતિ જોઈએ તો મનમાં એક જ મંત્ર જપવાનો છે. અને અંદર જતાં આવડશે તો બધા બાહ્ય ઉપચારો છૂટી જશે.

એકંદરે બધી જ જાણીતી વાતો, જાણીતા સત્યો લઈને આવેલી ગઝલ છતાં ગમે, કવયિત્રીની ગઝલ સ્વરૂપ પરની પકડ, દરેક સત્યને રજૂ કરવાની જુદી રીત, ઉચિત શબ્દ પસંદગી અને સહજ લાગતા પ્રાસાનુપ્રાસ.

મારી આ વાર્તા તમને વાંચવી ગમશે.

હાથ છોડો

લલિત ત્રિવેદી

04/12/2025 at 9:53 am

વાહ વાહ

છબીલભાઈ ત્રિવેદી

04/12/2025 at 9:56 am

વાહ ખુબ સરસ ગઝલ આધ્યાત્મિક અનુભુતિ અભિનંદન

Varij Luhar
04/12/2025 at 10:08 am

વાહ.. આસ્વાદમાં કહેવાયું છે તેમ જાણીતા સત્યો અને જાણીતી વાતોને સરસ રીતે વણી લેતી ગઝલ

Loading...

'સાજ' મેવાડા
04/12/2025 at 11:12 am

ખૂબ જ માર્મિક અર્થસભર ગઝલ.

Loading...