🔆કૃષ્ણ દવે ~ લીમડાને આવી ગ્યો🔆 -

લીમડાને આવી ગ્યો તાવ,
લીમડાના દાદા ક્યે કહી કહી ને થાકી ગ્યો,
જાવ હજી ફાસ્ટફૂડ ખાવ.

ટી-શર્ટ ને જીન્સવાળી માંજરી બિલાડી ક્યે આપણને દૂધ નહીં ફાવે !
પીત્ઝા ને બર્ગરની આખ્ખી આ પેઢીને રોટલી ને શાક ક્યાંથી ભાવે ?
વર્ષોથી બોટલમાં કેદી થઈ સડતા એ પીણાને પીવો ને પાવ.
જાવ હજી ફાસ્ટફૂડ ખાવ.

અપ ટુ ડેટ કાગડા ને કાગડીયું માઈકમાં મંડી પડ્યા છે કાંઈ ગાવા !
કંઈ પણ ભીંજાય નહી એવા ખાબોચિયામાં નીકળી પડ્યા છો તમે ન્હાવા ?
કૂંપળના ગીત લીલા પડતા મૂકીને ગાવ રીમિક્સના ગાણાઓ ગાવ.
જાવ હજી ફાસ્ટફૂડ ખાવ.

કાન એ કંઈ થૂંકવાનો ખૂણો નથી કે નથી પેટ એ કંઈ કોઈનો ઉકરડો,
આપણા આ ચહેરા પર બીજાના નખ્ખ શેના મારીને જાય છે ઉઝરડો ?
માંદા પડવાનું પોસાય કદિ કોઈને’ય સાંભળ્યા છે ડૉક્ટરના ભાવ ?
લીમડાને આવી ગ્યો તાવ
લીમડાના દાદા ક્યે કહી કહી ને થાકી ગ્યો,
જાવ હજી ફાસ્ટફૂડ ખાવ.

~કૃષ્ણ દવે

આ ગીત – બાળકોને મજા અને વડીલોને સમજવા !!!

એક આખી પેઢીએ એના સ્વાસ્થ્યની શહીદી આપવાનું નક્કી કર્યું છે. ખુદ માતા-પિતા પણ એની સાથે જ છે,

ફાસ્ટ ફૂડની જ્યાફતો અને એય અર્ધી રાતે ઝોમેટો સ્વીગીના રાગે….

હવે ઈશ્વર બચાવે તો છે, કૃષ્ણભાઈ તો આવા ગીતો ગાઈને…. હવે તમાશો જ જોવાનો છે ભાઈ !

મારી આ વાર્તા આપને વાંચવી ગમશે. આભાર.