પિનાકિન ઠાકોર ~ સરવર છલકી છલકી

*સરવર છલકી છલકી ચાલ્યાં*

કે સરવર છલકી છલકી ચાલ્યાં
શરદની રાતનાં હો રાજ;
કે ચાંદનીએ ચીતરી ચીતરી
મેલ્યાં પૂનમની રાતનાં હો રાજ

આભે વેરાય મોગરાની કળી કળી,
સરતી ઝરતી એ જાય ધરતીએ ઢળી ઢળી,
કે મન એનાં મલકી મલકી મ્હાલ્યાં
શરદની રાતનાં હો રાજ

એને હું જોઉંને ન મનમાં આનંદ માય,
એનો ઉલ્લાસ મારે રોમ રોમ રમી જાય,
કે અમરત નીતરી નીતરી રેલ્યાં
પૂનમની રાતનાં હો રાજ…

~ પિનાકિન ઠાકોર (24.10.1916 – 24.11.1995)