🔆એસ. એસ. રાહી ~ આવેલી એક તક🔆 -

આવેલી એક તક મેં અમસ્તી જ અવગણી
ખટકે છે તે દિવસથી સમય નામની કણી.

કાગળનો શ્વેત રંગ પછી લાલ થઈ જશે,
એ બીકે આંગળીની નથી કાઢતો અણી.

સંતાડી રાખ ધાબળામાં સૂર્યની ઉષ્મા,
જો હું અમીર થઈ ગયો તડકો વણી વણી.

જખ્મો વિશેના અલ્પ પરિચયમાં આટલું:
બિનવારસી છે લાશ ને કોઈ નથી ધણી.

નવરાશ મળી છે એ ક્ષણે વાંચી છે ડાયરી,
મેં રાત વિતાવી નથી તારા ગણી ગણી.

~ એસ. એસ. રાહી

ગહન ભાવોના દૃશ્યો ચીતરતી, ઊંડે સુધી સ્પર્શી જતી ગઝલ.

જીવનમાં પોતે તમામ તક ઝડપી લીધી હોય એવો માનવી શોધ્યો ન જડે. કુદરત અનેકવાર દરવાજો ખખડાવે છે, ક્યારેક સંભળાતું જ નથી, ક્યારેક ખોલતાં એટલી વાર લાગે છે કે એ સમય ત્યાંથી પાછો વળી ગયો હોય. આવું દરેક સાથે બને જ બને. પણ એનો ખટકો અનુભવનાર બહુ ઓછા. કેમ કે દ્વારે આવેલ એ નસીબ હતું એની કેટલાને ખબર પડે ?? જીવનના એક સત્ય સાથેની નિસબત અહીં પ્રગટ થઈ છે.

કવિને માટે કાગળ અને ટેરવાં એટલે કે આંગળી, આ બે શસ્ત્ર અને શાસ્ત્ર પણ ! જીવનનો ઉઘાડ અને આધાર પણ ! અને જુઓ, એ શેરમાં કેટલી સલૂકાઈથી કહેવાયું છે કે અંગત પીડા વ્યક્ત કરવાનો કોઈ અર્થ નથી ! આંગળીની અણી કાઢવાની વાત કેટલી ધારદાર બની છે ! એવું જ તડકો વણવાની વાતનું ! અને છેલ્લો શેર….. ડાયરી વાંચવાની નવરાશ મળે છે એ ક્ષણો રાતની છે. નાયકે તારા ગણ્યા નથી પણ તારા ગણવાનું પ્રતીક આખી રાતનો ઉજાગરો સહજતાથી સૂચવી દે છે…. વાહ કવિ !