🔆મહેન્દ્ર ‘સમીર’ ~ જેને કહી રહ્યા છો🔆 -

જેને કહી રહ્યા છો ગગન એ ચમન હતું,
અમ બુલબુલોનું એ કદી પ્યારું વતન હતું.

ને તારલાઓ જેમને કહેતા રહ્યા તમે,
એકેક અમ ચમનનું ભલા એ સુમન હતું.

આદિ ને અંત એક હતાં જિંદગી મહીં,
ના કો’ ધરા હતી અને ના કો’ ગગન હતું.

ના કોઈ યુગ હતો ન વળી કો ક્ષણ હતી,
જ્યાં ખુદ સમય તણું ન કો’ આવાગમન હતું

સાકી અમે જ, જામ અમે, મય-સદન અમે,
કૌસરની ઘૂંટથી જ ઘડ્યું તનબદન હતું.

સૈયદ ખુદ અમે જ હતા, બાગબાં અમે,
કીધું ધરા પ્રયાણ તે પહેલું પતન હતું.

જેને ધરા કહે છે તસવ્વુર ‘સમીર’ એ,
માનવ અનાદિ-કાફલાનું કૈં મનન હતું.

~ મહેન્દ્ર ‘સમીર’ (14.8.1931 – 11.5.1982)

@@@

🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. જો અગાઉ આપે subscribe કર્યું હશે તો ‘કાવ્યવિશ્વ’ના આ નવા સ્વરૂપમાં આપને ફરી subscribe કરવું પડશે. ઉપર જ જમણી બાજુ subscribe લખ્યું છે ત્યાં ક્લિક કરતાં ઈમેલ લખવાનું ઓપ્શન મળશે. આભાર🙏🏻