🔆વિનોદ જોશી ~ ખુલ્લી પાંખે પિંજરમાં🔆 -

☘️☘️

ખુલ્લી પાંખે પિંજરમાં ને બાંધી પાંખે બ્હાર,
અમે જીવતાં લઈને એવાં પંખીનો અવતાર!

હિલ્લોળાતી હવા હોય કે હવડ શ્વાસની ઢગલી
નિરખીને આકાશ માંડતાં, માંડ માંડ બે પગલી
વાદળ સાથે નથી અમારે વાતોનો વહેવાર!

અડખેપડખે જોઈ જોઈ અદ્દલ સોનાના સળિયા
ચણતાં રહીએ અમે અમારાં વેરાતાં ઝળઝળિયાં
પડછાયાનો એક જ અમને અધકચરો આધાર!

જીવતર લાગે ઊડવાની ઇચ્છાનો પડતર માળો
પાંખો ને પગનો સમજણમાં નથી થતો સરવાળો
રોજ વેઠતાં અવાવરુ ઉજ્જડ ટહુકાના ભાર!

~ વિનોદ જોશી

આ કવિતાનો નાયક/નાયિકા જ નહીં, આ વિશ્વમાં વસતો લગભગ પ્રત્યેક માનવી કોઈ ને કોઈ પ્રકારના પિંજરમાં બંધ છે. અલબત્ત આ પિંજર કોઈને દેખાતું નથી એ વાત જુદી છે. સ્વતંત્રતાનો, મુક્તિનો આભાસ લઈને સહુ જીવ્યે જાય છે અને એમ જ જિંદગી પૂરી થાય છે.

ઈશ્વરે બક્ષેલી વિશાળ પૃથ્વી કે હિલ્લોળાતી હવા છોડીને આપણે પોતે જ આપણી આસપાસ સોનાના સળીયા બનાવી દઈએ છીએ. નાયકને એનું ભાન છે એટલે એ પોતાનાં જ ઝળઝળિયાંની સંવેદના અનુભવી શકે છે. બાકી પિંજરની અંદર જ રહીને ખુલ્લાપણાનો ભ્રમ લઈને જીવતા સૌ માનવો!

બહુ જ ગમી આ પંક્તિઓ,
‘ચણતાં રહીએ અમે અમારાં વેરાતાં ઝળઝળિયાં’ – અંગત પીડાને અભિવ્યક્ત કરવા માટે અદભૂત પ્રતિકો અને શૈલી!
‘પાંખો ને પગનો સમજણમાં નથી થતો સરવાળો’ – પાંખ છે પણ પાંખપણું ગૂમ છે. પગ છે પણ એ એની સાચી ક્રિયાશીલતા ખોઈ ચૂક્યા છે. પણ જે ખોવાયું છે, નાયકની સમજણ સુધી પહોંચેલી વાત છે ને એની હાશ છે. બાકી ઉજ્જડ ટહૂકાઓથી વિશ્વ ભરેલું છે અને રહેશે.

ગીત – લયના બાદશાહ છે આ કવિ…… ભાવ, શબ્દો, અભિવ્યક્તિ, લય તમામ રીતે આ ગીત ખૂબ આસ્વાદ્ય બન્યું છે.

🥀કવિને જન્મદિવસના વંદન અભિનંદન🥀

🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. આભાર. 🙏🏻

હરીશ દાસાણી.મુંબઈ

13/08/2025 at 9:30 am

અત્યંત સુંદર સંવેદનશીલ ગીત

Kirtichandra Shah
13/08/2025 at 10:14 am

We are really lucky to have such a genieous poet with us

Loading...

છબીલભાઈ ત્રિવેદી

13/08/2025 at 10:13 am

વાહ ખુબ સરસ ગીત આસ્વાદ પણ સરસ

Kavyavishva
14/08/2025 at 9:41 pm

આભાર છબીલભાઈ.

Loading...

પુરુષોત્તમ મેવાડા 'સાજ'

13/08/2025 at 1:33 pm

વાહ,‌ ખૂબ સરસ ગીત. કવિ શ્રી વિનોદ જોશી ને જન્મ દિવસ ની હાર્દિક શુભેચ્છાઓ.

સુરેશ 'ચંદ્ર'રાવલ

14/08/2025 at 6:12 am

વાહ લતાબેન…! આપે શ્રી વિનોદ જોશીના ગીત કાવ્યનો સુંદર આસ્વાદ કરાવ્યો… ગીત કાવ્યના તેઓ સાચાં બાદશાહ છે.. તેમનાં ગીતોમાં લય અદભુત હોય છે… અહીં કવિએ પીન્જરના પંખીની વાત કરી પણ સાથે સાથે માનવની મનો વ્યથા પણ પ્રગટ કરી…!

Kavyavishva
14/08/2025 at 9:41 pm

આભાર સુરેશભાઈ.

Loading...

Minal Oza

14/08/2025 at 11:08 am

કવિને લયકારી બહુ સહજ છે.ગીતમાં પ્રતીકો દ્વારા માનવીની સંવેદના સુપેરે વ્યક્ત થઈ છે. આસ્વાદ પણ સરસ છે.
વિનોદભાઈને જ.દિ.ની ખૂબ ખૂબ શુભેચ્છાઓ ને અભિનંદન.

🔆વિનોદ જોશી ~ ખુલ્લી પાંખે પિંજરમાં🔆

Like this:

Related

8 thoughts on “🔆વિનોદ જોશી ~ ખુલ્લી પાંખે પિંજરમાં🔆 ”

Leave a Comment Cancel Reply