🔆લાલજી કાનપરિયા ~ ભીતર જલતી જ્યોત🔆 -

ભીતર જલતી જ્યોત મનવા ! ભીતર જલતી જ્યોત
બહાર રઝળી ભટકી શાને વેળ અમૂલખ ખોત ?

તિલક કરતાં ત્રિભુવન મળશે, કીધી કોણે વાત ?
પરથમ ઊતરીને તું અંદર ઓળખ તારી જાત.
આડંબરને આઘા મેલી ચીજ અસલ તું ગોત
ભીતર જલતી જ્યોત મનવા ! ભીતર જલતી જ્યોત

અડસઠ તીરથ કરીને આવ્યો પાછો નિજને ઘેર
નકલી વાઘા ગયા ઊતરી, રહ્યો ઠેરનો ઠેર !
મેલ બધાં જુઠ્ઠાણાં હવે આ ખેલ થયો બહોત
ભીતર જલતી જ્યોત મનવા ! ભીતર જલતી જ્યોત

પ્રેમરસનું પાન કરીને અલખ લિયે તું જાણી
જળકમળવત્ રહીને જગમાં મનખો લે તું માણી.
અમથી અમથી મૃગજળ પાછળ શાને મૂકે દોટ ?
ભીતર જલતી જ્યોત મનવા ! ભીતર જલતી જ્યોત

~ લાલજી કાનપરિયા (13.8.1943)

જીવનમાં એક સમય આવે છે જ્યારે મોટાભાગનાં લોકોને અંદરનાં અજવાળાં ખેંચે છે. ભીતરની જ્યોત તરફ વિશે એ જાગે છે. અલબત્ત મોટાભાગે એ અસ્થાયી હોય છે. સંસારની લીલા જ એવી છે કે માનવી એનો મોહ ત્યાગવા જાય અને સપડાય. આ આવાગમન ચાલતું જ રહે. પણ કોઈક વીરલા એવા પાકે કે જેના મનમાં આ દિશા સ્થિર થઈ જાય અને આખરે એ જ્યોત તરફ જાય….

કવિને વંદન

🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. આભાર. 🙏🏻