🥀 🥀
મને જિંદગીના પ્રસંગો ન પૂછો
બધા હસતાં, હસતાં પતાવી દીધા છે.
પ્રલોભન, જો આવ્યા છે જીવનમાં જ્યારે
મેં ખુદ્દારે દિલથી ફગાવી દીધા છે.
બધા ઓરતાઓ ને આશાઓ ક્યાંથી
ફળે, મંજરીની મહેક થઇને કાયમ
અફળ કામનાઓના ઓથાર બેશક
રહી મૌન દિલમાં સમાવી દીધા છે.
તરંગોની માફક જે દિલમાં ઊઠ્યા તે,
મનાવી લીધા છે રૂઠેલા ઉમંગો,
અને આવકાર્યા છે અવસર મળ્યા જે
હૃદય ઉર્મિઓથી વધાવી દીધા છે.
ખુદાની કસમ હું- છું ઇન્સાન ‘રૂસ્વા’
ને ઇન્સાનિયતનો પ્રશંસક રહ્યો છું,
મળી છે મને બાદશાહી ફરીથી
જે આવ્યા પ્રસંગો દીપાવી દીધા છે.
~ ‘રુસ્વા’ મઝલૂમી