🥀🥀
જાણીતા કવિ શ્રી રમેશ આચાર્યનું ગઈ કાલે દેહાવસાન થયું છે.
કવિ શબ્દદેહે આપણી સાથે છે.
એમની ચેતનાને વંદન.
🥀🥀
સૂર્યોદયની ચર્ચા થોડી,
કરવી પડશે વહેલી-મોડી.
ધરતી ફાડી અંકુર ફૂટ્યો,
રહેતું સચરાચર કર જોડી.
દરિયાનાં મોજાં મસમોટાં,
લાવે કાંઠે ફૂટી કોડી.
રેતીના કૂબા કૈં પાડી,
સાગરની હદ શિશુએ તોડી.
ચંદ્ર ઉપ૨ આદમ શું કરશે?
રહેશે ગઝલ પહેલાં ખોડી.
~ રમેશ આચાર્ય (26.10.1943 – 25.3.2025)
અને ચાર વૃક્ષકાવ્યો
🥀🥀
વાહનો આવતાં જોઈ
વૃક્ષોએ વનમાં
રસ્તો કરી આપ્યો
પણ હવે એ
આઘાં ખસી શકશે નહિ,
સડકની બંને બાજુએ
ખાઈ ખોદેલી છે.
🥀🥀
વૃક્ષને છેદો તો
એમાંથી નીકળે વૃક્ષ,
વૃક્ષને કાપો ને
રોપાઈ જાય વૃક્ષ;
વૃક્ષને બાળો ત્યાં
ઊગી જાય વૃક્ષ.
🥀🥀
વૃક્ષ,
હું અહીં ઊભો છું.
તું કંટાળી ગયું હોય તો
પેલી ખિસકોલીને
મારા શરીર પર
સંતાકૂકડી રમવાનું કહે.
🥀🥀
હું બેઠો છું
વૃક્ષનું ખોડીબારું પલાણીને,
ને વૃક્ષ તો
ઊંચે વધતું જાય છે.
~ રમેશ આચાર્ય (26.10.1943 – 25.3.2025)
આદરણીય દિવંગત કવિ શ્રી રમેશ આચાર્ય ને પ્રણામ.ગઝલ, અછંદસ કે તાંકા… દરેક સ્વરૂપ માં કવિની અનોખી સિદ્ધિ છે
કવિશ્રીને આદરપૂર્વક શ્રદ્ધાંજલી એમની રચનાઓને આવકાર
કવિમિત્ર રમેશભાઇ આચાર્યની કવિત્વમય સ્મૃતિઓ અને સ્નેહપૂર્ણ મૈત્રીસંબંધ માટે ભાવાંજલિ.
ખૂબ સરસ રચનાઓ. કવિશ્રીને કાવ્યાંજલી પ્રણામ.