ચંદ્રકાંત શેઠ ~ જલને જાણે

*જલને જાણે*

જલને જાણે ફૂલ ફૂટિયાં,
જલને આવ્યાં પાન,
જલને આવ્યું જોબન,
એનો ઊઘડ્યો અઢળક વાન. –

જલ ચાલ્યું ત્યાં રેલો ફૂટયો,
જલ નાચ્યું ત્યાં ઝરણું,
ભયું સરોવર, જલ જ્યાં મીંચી
આંખ માણતું સમણું. –

જલ તો મીઠા તડકે નાહ્યું,
કમલસેજમાં પોઢ્યું,
કોક મોરને ટહુકે જાગ્યું,
હસતું દડબડ દોડ્યું ! –

ટપ ટપ ટીપાં ટપકે,
જલની આંખો સાથે ઝબકે,
કરતલમાં જ્યાં ઝીલો,
મોતી મનમાં સીધાં સરકે. –

ભીતર બેઠાં રાજહંસને
પરશે જ્યાં એ મોતી,
રાજહંસ મોતીમાં છૂપ્યું
માનસ રહેતાં ગોતી.

~ ચંદ્રકાન્ત શેઠ

જળનું અદભૂત શબ્દચિત્ર !