દિલિપ ઝવેરી ~ સિંહ – બદામી ટેકરીઓ -

હરણનો શિકાર

સિંહ – બદામી ટેકરીઓ
ઝરણાશા વ્હેતા આભકિનારે થંભી આવ્યો
હવામહીં તરવરતો તડકો
ઠેકઠેકમાં થરકે લીલાં પાન
ઝીણા તારે કરોળિયો શી પીતો સૂરજ હૂંફ!
નીકળી હળવે પગલે બહાર કાચિંડો લીલો
અને ઘાસ પે ઝાકળ ઝબક્યું
ધુમ્મસના પંજાની વધતી ભીંસ
તાર પર બેઠાં કબૂતર ઊડ્યાં
પૂંઠળ દોડ્યા મોટા પડછાયા
ને ફેલાયા નળિયાં પર
જેની હેઠ દબાયાં મકાન
ભીંતે કપાયલી બારીની
દદડયા અવાજ
કટકા થયા અર્થના શબ્દે શબ્દે
શબ્દ મહીંથી
આંખ ચામડી જીભ નાક ને કાન બન્યાં
આ હવા મહીં ઓગળતાં જાતાં રૂપ એમનાં
અને ફરી ઝરણાશું વ્હેતું આભ કિનારે
તડકો પીને
સિંહ – બદામી ટેકરીઓ.