ઘણી ખમ્મા!
શિખર ઉપર દીવો પ્રગટાવનારાને ઘણી ખમ્મા!
તળેટીનો ખૂણો અજવાળનારાને ઘણી ખમ્મા!
હલેસા મારવાનાં જોમથી વાકેફ થવાયું છે,
મને મઝધારમાં છોડી જનારાને ઘણી ખમ્મા!
પગરખાં પહેરવા મળતા નથી – સંજોગવશ જેને,
બધાં એ સ્થિર ડગલાં માંડનારાને ઘણી ખમ્મા!
છતાં કઠપૂતળીને લાગતું કે મુક્ત છે પોતે,
ચીવટથી એમ દોરી બાંધનારાને ઘણી ખમ્મા!
હતો વાકેફ તો મારી થનારી હારથી એ પણ,
અહો! છેવટ સુધી પડકારનારાને ઘણી ખમ્મા!
~ હર્ષા દવે
ખુલાસા નથી મંગાતા, ખબરદારની હાકલ નથી કરાતી પણ સતત કસોટી કરનારને કહેવાય છે, બસ ‘ઘણી ખમ્મા’ !! વાહ
બંને ગઝલો માટે દાદ દેવા જેવી
હર્ષાબેનની બન્ને ગઝલ સંવેદનશીલ છે.
અભિનંદન.
વાહ, સરસ અભિવ્યક્તિ કવિતાઓમાં કરી છે.
ચીવટથી દોરી બાંધનાર ને ઘણી ખમ્મા, તમારી pinchi કરતાં સમય ની દોટ….બને રચનાઓ lalitya ભરેલી અને ગહન છે