મને ડાળખીને
એક ભૂરા આકાશની આશા ફૂટી
મને ડાળખીને પંખીની ભાષા ફૂટી.
ચાંદનીના ખોળામાં સૂરજનો તડકો
ને ફૂલની હથેળીમાં તારો;
સાગરના સ્કંધ ઉપર પારેવું થઈ
ઘૂઘવે પવન : વણજારો.
જાણે માછલીને જળની પિપાસા ફૂટી
મને ડાળખીને પંખીની ભાષા ફૂટી.
ખીલતી આ કળીઓની કુંવારી કૂખમાં
પોઢ્યાં પતંગિયાનાં ફૂલ;
આંખો જુએ તેને હૈયું ને હોઠ કહે:
અમને તો બધ્ધું કબૂલ.
મારી સઘળી દિશાને તલાશા ફૂટી
મને ડાળખીને પંખીની ભાષા ફૂટી.
~ સુરેશ દલાલ
કવિને સ્મૃતિ વંદન
સુરેશભાઈ ગુજરાતી સાહિત્ય અને ગઝલ નું એક સ્વર્ણીમ
હરોળ મા કહી શકાય એવું પાત્ર જેને ગુજરાતી ની સેવા માંજ
પોતાનું જીવન સમર્પિત કર્યું છે ભલે આજે આપણી વચ્ચે નથી
પણ જ્યાં હોય ત્યાં એમને અમારા વંદન પહોંચે
કે બી સોપારીવાલા