🔆કૃષ્ણ દવે ~ આલ્લે લે!🔆 -

આલ્લે લે આવ્યો વરસાદ !
ગઈકાલે વાદળીને ઇમેલ કર્યો ને આજ વાંચી પણ લીધી ફરિયાદ
આલ્લે લે આવ્યો વરસાદ !

ઝળહળતા જળના ઇ મોતીડાં ઠલવે છે પળભરમાં પાવડે ને પાવડે
વાદળ બનવાનું તો એનું ગજું છે જેને તરસના તરજુમા આવડે
સુતેલા ઝરણાંઓ સાંભળીને જાગી ગ્યા છાંટા વચ્ચેનો સંવાદ
આલ્લે લે આવ્યો વરસાદ !

આમ તો એ મન મૂકી વરસી પડે છે એને ચાતકપણું જ્યાં દેખાય
માટીની મ્હેકને જે માણી શકે ને ભાઈ એને ચોમાસું સમજાય
એકલા કાંઈ મોરલાઓ ટેહુકતા ન્હોતા,આ ઝાડવા’ય પાડતા’તા સાદ
આલ્લે લે આવ્યો વરસાદ !

~ કૃષ્ણ દવે

કવિએ તો વરસાદને આજની ભાષામાં એટલે કે ઈમેલ કરીને બોલાવ્યો છે.

વાદળ બનવાની લાયકાત કે ચોમાસાને સમજવાની ઉકલત માટેના કલ્પનો મજા પડી જાય એવા.

આમેય આ મોસમમાં વરસાદને નિરખવો, વાંચવો એની મજા જ મજા અને પલળવા મળે, પલળી શકાય એવું તન-મન હોય તો તો ન્યાલ થઈ જવાય!

આ કવિ સાંપ્રત ઘટનાને તરત પોતાના ગીતોમાં ગૂંથી વણી લે છે…. લય એમના લોહીમાં વહે છે…..

🥀દિનવિશેષ : પારુલ ખખ્ખર, પંકજ વખારિયા, સાજ મેવાડા, મયૂર કોલાડીયા🥀