🔆આશા પુરોહિત ~ એય, તને🔆

એય, તને મનમાં સમાવું તો ચાલશે?
રાતડીની નીંદર ને નીંદરમાં સપનાં,
ને સપનામાં આવું તો ચાલશે?

પ્રશ્નો પર પ્રશ્નો હું પૂછ્યાં કરું
ને બસ પૂછ્યાં કરું છું એ જ ધૂનમાં
સૃષ્ટિમાં રોજ તને નીરખ્યાં કરું
ને બસ નીરખ્યાં કરું છું તને તૃણમાં
એય, તને બોલાવું ત્યારે તું આવશે?

લાગણીના અણદીઠ્યાં શ્વેત શ્વેત રંગ મહીં
ઇન્દ્રધનુષી એક વાત
સંબંધો જોડવા ઇચ્છાઓ જન્મે
ને ઇચ્છાઓ થામી લે હાથ
એય, મારી ઇચ્છાનો બાગ હવે ફાલશે?

ઇચ્છાઓ જન્મે તો પૃચ્છાઓ જન્મે
ને પ્રશ્નાર્થને સમજી તો લે
ચૂપ ચૂપ રહીને પણ કહેવું જરૂર
એ ભાવાર્થને સમજી તો લે
એય,  સાથે રહેવું શું તને ફાવશે?

એય, તને મનમાં સમાવું તો ચાલશે?
રાતડીની નીંદર ને નીંદરમાં સપનાં,
ને સપનામાં આવું તો ચાલશે?

~ આશા પુરોહિત

મજાનો વાતચીતનો લહેકો….,.. ‘એય’ કહીને પ્રેમી સાથે થતી વાતો….. ‘સપનામાં આવું તો ચાલશે?’

ગીત વાંચતાં મજા તો આવી જાય ને સાથે પૂછવાનું પણ મન થાય ‘એય તમે ખોવાઈ જાવ એ ના ચાલશે !’

🥀દિનવિશેષ : જ્યોત્સના ત્રિવેદી, મહેશ ‘સ્પર્શ’🥀 

ક્ષણો, ભીની ને સુક્કી