🔆સૌમ્ય જોશી ~ ભગવાન મહાવીર🔆

*ભગવાન મહાવીર અને જેઠો ભરવાડ*

આ સ્યોરી કેવા આયો સું ન ઘાબાજરિયું લાયો સું
હજુય દુઃખતું હોય તો લગાડ કોન પર, ન વાત હોંભર મારી.

તીજા ધોરણમો તારો પાઠ આવ છ : ‘ ભગવોન મહાવીર’.
અવ ભા ના પાડતા’તા તોય સોડીન ભણવા મેલી મોંડમોંડ.
તે ઈણે ઈસ્કૂલથી આઈને પથારી ફેવરી કાલ.
ડાયરેક્ટ ભાને જઈન કીધું
ક આપડા બાપ-દાદા રાક્ષસ તે મહાવીરના ભગવોનના કોનમાં ખીલા ઘોંચ્યા.

હવ ભાની પરશનાલિટી તન ખબર નૈ,
ઓંખ લાલ થાય એટલે શીધ્ધો ફેંશલો.
મને કે’ ઇસ્કૂલેથી ઉઠાડી મેલ સોડીન.

આ તારા પાઠે તો પથારી ફેરવી હાચ્ચન.
હવ પેલાએ ખીલા ઘોંચ્યા ઈ ખોટું કર્યું મુંય માનું સું.
પણ ઈન ઓછી ખબર હતી તું ભગવોન થવાનો
ને તીજા ધોરણમાં પાઠ આવવાનો તારો

ઈનું તો ડોબું ખોવાઈ જ્યું તો ગભરાઈ જ્યો બિચારો
બાપડાના ભા મારા ભા જેવા હશે
આ મારથી ચંદી ખોવાઈ જઈતી
તો ભા એ ભીંત જોડે ભોંડું ભટકઈન બારી કરી આલી’તી ઘરમોં
તો પેલાનું તો આખું ડોબું જ્યું તારા લીધે
દિમાગ બરાબર તપ્યું હશે
તો ઘોંચી દીધા ખીલા

વોંક ઈનો શી. હાડીહત્તર વાર ખરો
પણ થોડોક વોંક તારોય ખરોક નઈ ?
અવ બચારો ચ્યોંક જ્યો
તો બે મિનિટ આંશ્યું ફાડીન ઈનું ડોબું હાચવી લીધું હોત તો
શું તું ભગવોન નો થાત ?
તારું તપ તૂટી જાત ?

અવ ઈનું ડોબુંય ઈનું તપ જ હતુન ભઈ ?
ચલો એય જવા દો
તપ પતાઈન મોટો મા’ત્મા થઈન બધાન અપદેસ આલ્વા મંડ્યો
પસીય તન ઈમ થ્યું ક પેલાનું ડોબું પાસું અલાઉં ?

તું ભગવોન, માર તન બઉ સવાલ નહીં પૂસવા
મુ ખાલી એટલું કઉસું ક
વોંક બેયનો સે તો ભૂલચૂક લેવીદેવી કરીન
પેલો પાઠ કઢાયન ચોપડીમથી
હખેથી ભણવા દેને મારી સોડીન

આ હજાર દેરાં શી તારાં આરસનાં
તો એક પાઠ નઈ હોય તો કંઈ ખાટુંમોરું નઈ થાય.
તોય તન એવું હોય તો પાઠ ના કઢાઈસ બસ
ખાલી એક લીટી ઉમેરાય ઈમોં
ક પેલો ગોવાળિયો આયો’તો,
સ્યોરી કઈ જ્યો સ,
ન ઘાબાજરિયું દઈ જ્યો સ.

~ સૌમ્ય જોશી

ભગવાન મહાવીર ધ્યાનમાં હતા અને એક ભરવાડે આવીને થોડીકવાર પોતાનાં ઢોરોનું ધ્યાન રાખવા કહ્યું. ભગવાન તો સમાધિમાં. ભરવાડ આવ્યો અને જોયું તો એક ઢોર ક્યાંય નીકળી ગયેલું. ભગવાન મહાવીર તો ક્યાં આ સંસારમાં જ હતા કે જવાબ દે! ભરવાડ ખીજાયો અને ભગવાનના કાનમાં કાંટા ખોસી દીધા.

આ વાર્તા તો આપણે બધા આપણા પાઠ્યપુસ્તકમાં ભણી ગયાં છીએ.

હવે કવિની કલ્પના એમાં કેવો રંગ પૂરે છે એ જુઓ, કવિ સૌમ્ય જોશીની કલમે ! ‘એનું ડોબુંય ઇનું તપ હતું ન !’ નોંધવા જેવી વાત લાગી ને!

ભાષા એ ગામઠી જ રાખી છે એટલે જરૂર પડે તો પંક્તિ બે વાર વાંચી લેવી…. મજા આવશે.

🥀દિનવિશેષ : ઉષ્મા શુક્લ, સૌમ્ય જોશી, યોગેશ જોશી🥀 

અન્ય કૌટુંબિક સમસ્યાઓ