🔆ઉષા ઉપાધ્યાય ~ અમે વૃક્ષની જાત🔆

અમે વૃક્ષની જાત
અમે ના ખળખળ વહીએ સંગે.

ડાળ-પાનમાં રહે ઝીલાતો, જળનો નાતો સ્હેજ!
ફૂલ-કળીમાં છલકે સઘળે જળનું ઝલમલ તેજ,
પામિયા અચળપણાના શાપ
અમે ના ખળખળ વહીએ સંગે.

થાય અધિકું કદી, ઝૂકીને નિરખી લઈએ જળમાં,
વળી સમેટી જાત, ઊતરીએ સદીઓ જૂનાં તળમાં,
પામિયાં મૂળ-માટીનું રૂપ
અમે ના ખળખળ વહીએ સંગે.

હશે અધિકાં મારાં કરતાં પરપોટાનાં ભા’ગ,
ભલે પલકભર વહે ઝીલતાં મેઘધનુષી રાગ,
અમારે ઝીલવી નરદમ ધૂપ
અમે ના ખળખળ વહીએ સંગે.

~ ઉષા ઉપાધ્યાય

વૃક્ષ અને જળનો સંબંધ અવિચળ. માતા અને બાળક જેવો કહી શકાય. જળ વિના વૃક્ષ નહીં. પણ તોયે વૃક્ષને ખળખળ ન વહી શકવાનો વસવસો છે. અલબત્ત જળના વરદાનને એ સતત અનુભવે છે, ડાળ-પાનમાં, ફૂલ-કળીમાં…. જળ વિના એમનું તેજ ક્યાં?   

મન થાય છે, હા, ઝૂકીને નિરખવાનું… તળમાં વહેતી ભીનાશ પણ એટલી જ હૈયે વસે છે. એટલે મૂળ-માટીમાં પ્રાણ વસે છે…. પણ ખળખળ વહી શકાતું નથી!!  એટલે સુધી કે પાણીમાં ઉઠતાં પરપોટા પ્રત્યે પણ ઈર્ષ્યા જન્મે છે!

ગીતનો લય ખળખળ વહે છે….. પ્રાસની રમત ક્યાંક ચુકાય તોય આનંદના વહેણમાં ક્ષતિ નથી વરતાતી…..

***

🌸દિનવિશેષ : પ્રજ્ઞા વશી, બંસી મધુકૃષ્ણ🌸  

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

એક હતી પિંકી