🔆છાયા શાહ ~ પાંદડાનું પડી જવું🔆

પાંદડાનું પડી જવું
એ પાનખર નથી,
વૃક્ષનો નિર્ણય છે
હવે નવું જીવન જીવવાનું.

વિલાતી કળી વચ્ચે વિલાઇ જવું,
એ ભ્રમરનું મૃત્યુ નથી
એનો પ્રેમ છે હરપળ સાથે રહેવાનું.

સાગરનું તપીને વરાળ થવું
એ બાષ્પીભવન નથી
સૂર્યની કોશિષ છે
સાગરને નભની સફર કરાવવાનું.

તારાનું ખરી પડવું
એ તેની ગફલત નથી
એની અંતિમ ઇચ્છા છે
પૃથ્વીનું કફન ઓઢવાનું.

વેરાન જંગલો વચ્ચે,
ઊંચા બનીને ઊભવું
એ પર્વતનું ગૌરવ નથી
એની મજબૂરી છે
સાવ એકલા બનીને જીવવાનું.

તૃણ પરનું પાણી
એ ઝાકળ નથી
એના આંસુ છે
શું નભને મારે ક્યારેય નહીં અડવાનું ?.

~ છાયા શાહ

દિવ્ય ભાસ્કર @ કાવ્યસેતુ 309 @ 5 ડિસેમ્બર 2017 * લતા હિરાણી  

કેટકેટલી ચીજો માટે આપણે આમ કે તેમ માની લેતા હોઈએ છીએ ! ખરતા પાંદડા વૃક્ષને દુખી કરે ને બિડાઈ જતી કળી વચ્ચે ભ્રમર ગૂંગળાઈ મરે ! તારા ખરીને સપનાં સાચા કરે ને પહાડો તો હરદમ ઊભા રહે. આ એક સ્થિતિ છે. એના વિષે કોઈ કંઇપણ કલ્પના કરી શકે છે. સામાન્ય માણસ અન્યોએ કહેલી વાત જેમની તેમ સ્વીકારી લે છે. એમાં સગવડ છે. શાંતિ છે. નિરાંત છે. એટલે તો સદીઓથી આપણે ‘પર્વતો જેવા ઉન્નત’  એવું કહી શકીએ છીએ. પણ કવિ આ સ્વીકારવા તૈયાર નથી અને આ દરેક સ્થિત્તિનો જુદો અર્થ કાઢે છે.

કવિને કલ્પનાલોકમાં ઉડ્ડયન કરવાની આદત હોય છે. અને જુઓ, આ કલ્પનાઓમાં સાચે જ મજા આવે છે. પાનખર શબ્દ સાંભળતા જ મન ઉદાસ થઈ જાય પણ આ કવિતા વાંચ્યા પછી વૃક્ષની નવજીવન જીવવાની ઇચ્છા યાદ આવશે અને મન ખુશ થઈ જશે. હા, થોડો સમય ખરી પડેલા પાંદડાઓ નજર સમક્ષ તર્યા કરશે એ જુદી વાત છે ! ભ્રમર માટે તો પોઝીટીવ, નેગેટીવ બંને કલ્પનાઓ વિદ્યમાન છે, સાચી વાત ભ્રમર જ જાણે ! પાણીનું વરાળ થવામાં સાગરને નભની સફર કરાવવાની કલ્પના મજેદાર છે ! ‘ખારા ખારા ઉસ જેવા…’ કવિતા યાદ આવી ગઈ. એમાં સાગરની વિશાળતા બહુ સરસ રીતે દર્શાવી છે પણ ‘ખારા ખારા ઉસ જેવા’થી કવિતાની થતી શરૂઆત મોમાંય ખારાશ દેતી. લો, હવે મન પણ નભમાં ઉડ્ડયન કરશે.

દરેક પ્રાકૃતિક તત્વની સ્થિતિને આમ આનંદની સફર બનાવી હોત તો મજા પડત પણ ભઈ આ તો કવિની વાત છે. આપણે ધારીએ એમ જ થોડા ચાલે ! ખરતો તારો જોવાથી સપનું સાચું પડે એવું બાળપણમાં સાંભળ્યુ હતું. હવે મૂંઝવણ થશે. હા, પહાડોને મજબૂર માનવા અઘરું પડશે. કદાચ એને કવિ પૂરતું જ પાછું સોપી દઉં ! જો કે આ  મારી વાત છે. તમારે સ્વીકારવું હોય તો તમારી મરજી ! હા, તૃણ પર જામેલા ઝાકળના બુંદ નભને અડવાની કલ્પના કરે એમ જ માનીએ. દરિયાના પાણીની જેમ એ પણ ભલે આભે અડે ! અલબત્ત કવિએ એને ભલે આંસુ ગણાવ્યા ને થોડી લાચારી પણ દર્શાવી…… કવિની જેમ આપણનેય છૂટ હોય ને ! બાકી છે ને મજાની વાત !

🌸દિન વિશેષ : કે. સચ્ચિદાનંદ🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

ફળવિતરણ