🔆નિશા નાણાવટી ~ અક્ષર અક્ષર🔆 -

અક્ષર અક્ષર દોડી લઈએ, બીજું તો શું કહીએ, હેં !
એમ તમોને ખોળી લઈએ, બીજું તો શું કહીએ, હેં !

કોઈ કહે કે મળવા માટે ઠામ ઠેકાણું આપો કંઈ
ગંધ ગુલાબી દોરી દઈએ, બીજું તો શું કહીએ, હેં !

એ આવે તો બારીમાંથી છેક ગામને પાદર જઈ
શ્વાસ અમારા ખોડી દઈએ, બીજું તો શું કહીએ, હેં !

અધરાતે મધરાતે વણસે વાત કલમ–કાગળ માંહે
ગઝલ મૂકીને ગોળી લઈએ, બીજું તો શું કહીએ, હેં !

નિયમ, રસમ, ચીલા ને શરતો તમને સઘળું સોંપ્યું ભઈ
અમે અમારું ફોડી લઈએ, બીજું તો શું કહીએ, હેં !

~ નિશા નાણાવટી ‘નિશી’

‘ગંધ ગુલાબી દોરી દઈએ’ વાંચતાં જ આ કાવ્ય ગમી ગયું.

‘અક્ષર અક્ષર દોડી લઈએ, બીજું તો શું કહીએ, હેં ! / એમ તમોને ખોળી લઈએ, બીજું તો શું કહીએ, હેં !’ અહીં કેવી સરસ રીતે પ્રિય પાત્રને ખોળવા માટે અક્ષરો સુધી, શબ્દો સુધી પહોંચવાની વાત છે !! એવી રીતે પાદર શ્વાસ ખોડવાની વાત ! અને ‘ગઝલ મૂકીને ગોળી લઈએ’ એ સામાન્ય વાતમાં પણ કેવું વજન ઉપસાવી શક્યા છે!

કલ્પનો નિરાળા, મસ્તીભર્યા અને છતાં વજનદાર છે એટલે કે વાત કહેવામાં એક લહેકાની લિજ્જત છે…. ‘બીજું તો શું કહીએ હેં’ કહેતાં કવયિત્રી બીજું ઘણું બધું કહી દે છે અને પૂરા દમથી ! મિજાજ ગમી જાય એવો છે નૈ !

🌸દિન વિશેષ : ‘નસીમ’, ત્રિભુવન ગૌરીશંકર વ્યાસ🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏