🔆સાજ મેવાડા ~ તું મને🔆

તું મને સમજી શકે તો વાત કર,
કાં તને સમજી શકે તો વાત કર.

ના બડાઈ હાંક મોટા જૂથની,
સંપને સમજી શકે તો વાત કર.

જો કરે સંવાદ તો રસ્તો મળે,
અન્યને સમજી શકે તો વાત કર.

પ્રેમ મા નો હોય એની ના નથી,
બાપને સમજી શકે તો વાત કર.

પાન ખરશે એમ કૂંપળ ફૂટશે,
ચક્રને સમજી શકે તો વાત કર.

પુસ્તકો વાંચી કહે પંડિત થયો,
કૃષ્ણને સમજી શકે તો વાત કર.

વાદ્યના સૂરો બધા અકબંધ છે,
‘સાજ’ને સમજી શકે તો વાત કર.

~ ‘સાજ’ મેવાડા

‘વાત કર’ ગઝલની વાત
આપણા રોજના જીવનમાં વાતચીત, વાર્તાલાપ થયા કરતા હોય છે. ખાસ કરીને અંગત વ્યક્તિઓ સાથે કોઈ વિષય પર ચર્ચા, વાતચીત થાય ત્યારે એકબીજાને સમજવા, સમજાવવા પ્રયત્ન કરીએ છીએ. પણ ઘણીવાર એકબીજાને નહીં સમજી શકતાં એવું બને કે સંવાદ ન રહેતાં એ વિસંવાદ કે વિવાદ થાય છે. એમાંય જો મા-બાપ અને બાળકો વચ્ચેની વાતચીત હોય તો ઘણીવાર પિતાને એવું લાગે કે બાળક અને માતા લાંબુ વિચારતા નથી, જ્યારે પિતાની વાતમાં ભવિષ્યનો પણ ખ્યાલ રખાતો હોય છે. ચર્ચા વિચારણા થાય અને એક બીજાના વિચારોની ચકાસણી કરી યોગ્ય નિર્ણય લેવાય એ સામાજિક અને કૌટુંબિક સંસ્થાને ટકાવી રાખવા માટે જરૂરી છે. આવે સમયે એક જણ બોલે કે તમે મારી વાત સમજતાં નથી અને બોલી જવાય, ‘સમજી શકે તો વાત કર’. આમ એક પ્રલંબ રદ્દીફની ગઝલ બની. મત્લા એ રીતે આવ્યો કે આગળ કાફિયા માટે ત્રણ જ અક્ષરની જગ્યા રહી, છતાં ગઝલ સાંગોપાંગ ખરી ઉતરી. આશા રાખું છું, આપ સૌ વાચકોને, ભાવકોને ગમશે.~ સાજ મેવાડા

ગઝલ જરૂર ખરી ઊતરી, વાતચીતમાં સંબંધો ખરા ઉતરે એવું ભાગ્યે જ બને છે. ચર્ચામાં, દરેક વ્યક્તિને એમ હોય છે કે ‘હું સાચો/સાચી’. સંબંધોનું સૌંદર્ય જાળવવા માટે સંવાદની સમજણ કેળવવી પડે! ~ લતા હિરાણી

🌸દિન વિશેષ : ‘નસીમ’, ત્રિભુવન ગૌરીશંકર વ્યાસ🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

કહેવું પડે હોં ! (હાસ્ય)