🔆પુનિત મહારાજ ~ ભૂલો ભલે🔆

ભૂલો ભલે બીજું બધું, મા બાપને ભૂલશો નહી..!
અગણિત છે ઉપકાર એના, એહ વિસરશો નહી..!

પથ્થર પૂજ્યા પૃથ્વી તણા, ત્યારે દીઠું તમ મુખડું,
એ પુનિત જનનાં કાળજાં, પથ્થર બની છુંદશો નહી..!

કાઢી મુખેથી કોળીયા, મ્હોંમાં દઈ મોટા કર્યા,
અમૃત તણાં દેનાર સામે, ઝેર ઉગળશો નહી..!

લાખો લડાવ્યાં લાડ તમને, કોડ સૌ પુરા કર્યા,
એ કોડના પુરનારના, આ કોડને ભૂલશો નહી..!

લાખો કમાતા હો ભલે, મા બાપ જેથી ના ઠર્યા,
એ લાખ નહિ પણ રાખ છે, એ માનવું ભૂલશો નહી..!

સંતાનથી સેવા ચહો, સંતાન છો સેવા કરો,
જેવું કરો તેવું ભરો, એ ભાવના ભૂલશો નહી..!

ભીને સૂઈ પોતે અને, સુકે સુવડાવ્યા આપને,
એ અમીમય આંખને, ભૂલીને ભીંજવશો નહી..!

પુષ્પો બિછાવ્યાં પ્રેમથી, જેણે તમારા રાહ પર,
એ રાહબરના રાહ પર, કંટક કદી બનશો નહી..!

ધન ખરચતાં મળશે બધું, માતા પિતા મળશે નહી..!
પળ પળ ‘પુનિત’ એ ચરણની, ચાહના ભૂલશો નહી..!

~ પુનિત મહારાજ (19.5.1908-27.8.1962)

‘જનકલ્યાણ’ના સ્થાપક પુનિત મહારાજને વંદન.

પુનિત મહારાજને મન સાહિત્યનું કેટલું મૂલ્ય હતું કે ‘જનકલ્યાણ’ જેવા માસિકની એમણે સ્થાપના કરી. આજે ગુજરાતી સામયિકોમાં સૌથી વધારે ફેલાવો ધરાવતું આ સામયિક હશે!

સાવ સીધી સાદી વાત પણ પાયાની વાત. સંતોની બાની આવી જ હોય. એમના માટે જીવન મહત્વનું હોય, મૂલ્યો અગત્યનાં હોય, ભાષા કે એની ભભક નહીં. સમાજને દિશા ચીંધવાનું એમનું કામ. બગાડ દૂર કરવાનું એમનું કામ. કવિતા સ્વરૂપે કોઈ વાત કહેવાનો કેટલો અર્થ સરે છે, કે આ શબ્દો કોઈપણ ગુજરાતી વાંચે કે યાદ કરે એના મનમાં એ સૂર રૂપે પ્રગટી જ જાય. અને ગાયેલી વાત કદી ભૂલાતી નથી !

🌸દિન વિશેષ : ચંદ્રકાન્ત દત્તાણી, કમલ વોરા, પુનિત મહારાજ🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏  

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

પ્રવેશ જીવનમાં