🔆મનોજ ખંડેરિયા ~ તળેટી જતાં🔆

તળેટી જતાં એવું લાગ્યા કરે છે
હજી ક્યાંક કરતાલ વાગ્યા કરે છે

કિરણ એવું મધરાતે અડક્યું કે આંખો –
જગત ના દિસે તો યે જાગ્યા કરે છે

અમે વેચવા નીકળ્યા મોર-પીંછા
છતાં એમ ક્યાં કોઇ માગ્યા કરે છે

ભુતળ મર્મ જેવો પદારથ ન એકે
પકડવા જઉં એમ ભાગ્યા કરે છે

અહીં આપણે આપણા શબ્દ ગાવા
જમાનો તો બીજું ય માગ્યા કરે છે

~ મનોજ ખંડેરિયા

‘કાવ્યવિશ્વ’ના નિયમિત ભાવક શ્રી છબીલભાઈ ત્રિવેદીની પસંદનું આ કાવ્ય. પોતે હાડે શિક્ષક અને જૂનાગઢનાં હોવાથી તળેટી, ગિરનાર અને વળી કવિતા સાથેય અતૂટ નાતો.

કવિ શ્રી મનોજ ખંડેરિયા, શ્રી રાજેન્દ્ર શુક્લ, રમેશ પારેખ, હર્ષદ ચંદારાણા જેવા અનેક ધરખમ કવિઓને અનેકવાર રૂબરૂ મળીને એમના મુખે કવિતા સાંભળવાનો લ્હાવો એમણે લીધો છે!

મને ખાતરી છે છબીલભાઈ કે આપની પાસે ભણેલાં બાળકોમાં કવિતાપ્રેમ જરૂર જળવાઈ રહ્યો હશે.

યુટ્યુબ પર આ ગઝલનું સ્વરાંકન-ગાયન ન મળ્યું પણ એ શોધવામાં મને કવિ શ્રી મનોજ ખંડેરિયાના અવાજમાં આ ગઝલ મળી. આપને અને અન્ય કવિતાપ્રેમીઓને જરૂર ગમશે.  

આભાર છબીલભાઈ.

🌸દિન વિશેષ : ચંદ્રકાન્ત દત્તાણી, કમલ વોરા, પુનિત મહારાજ🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏  

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏