🔆શૈલેષ પંડ્યા ‘ભીનાશ’ ~ હરિ હવે🔆

હરિ હવે કરો સ્વીકાર
શાને તમે બેઠા બેઠા હજી કરો વિચાર
હરિ હવે કરો સ્વીકાર

નંબરના ચશ્મા પહેરી, હું દેખું ઝાંખું પાંખું
આંખોમાં હું રાખું તમને, લેન્સ-બેન્સ શું નાખું
ઝળહળ ઝળહળ પહેરું તમને છૂટી જાય વિકાર
હરિ હવે કરો સ્વીકાર

વાતે હું ચડી ને જયારે સજળ થઈ ગઈ આંખો
તિથિ વાર લખ્યા ‘તા તમને ક્યારે ફૂટી પાંખો
એક કાંકરી મારી ફોડો થઈ ગઈ હું ચિક્કાર
હરિ હવે કરો સ્વીકાર..

~ શૈલેષ પંડ્યા ‘ભીનાશ’

દિવ્ય ભાસ્કર @ કાવ્યસેતુ 308 @ 28 નવેમ્બર 2017 * લતા હિરાણી   

હરિ કાવ્યો કાવ્ય સાહિત્યનુ એક આગવું અંગ બની રહ્યાં છે. અનેક કવિઓનાં હરિકાવ્યો લખ્યા જોઈએ તો વિષય એક હોવા છતાં મોટાભાગના કવિઓ એમાં આગવી અસર, આગવી આરત ઉપજાવી શક્યા છે. આ કાવ્યને પણ એમાંનું એક ગણી શકાય. એ વાત જુદી છે કે આ હરિ, ક્યાંક પેલો વાંસળીવાળો કનૈયો છે તો ક્યાંક આ પૃથ્વી પર વસતો, જીવતોજાગતો એક પ્રિયતમ. મૂળે હરિ પ્રેમીઓ માટે એક આદર્શ છે એટલે ફિલ્મીગીતકારોએ પણ એને છોડ્યા નથી.

અન્ય કવિઓને ટીવીના પડદાનું પ્લેટફોર્મ આપતાં આપતાં કવિએ જે કાવ્યસંગ્રહ આપ્યો એનું શીર્ષક ‘નિખાલસ’ અને એમાંની આ રચના. પોતાને સ્વીકારી લેવાની આર્દ્ર અરજી કરતી રચનામાં નાયિકા કહે છે, ‘શાને કરો વિચાર ? હરિ હવે કરો સ્વીકાર.’ આ પંક્તિમાં હરિ એટલે એક જીવતાજાગતા પ્રેમીનો ભાસ થાય છે કેમ કે સ્વીકાર, અસ્વીકારની વાત માનવી પાસે હોય. ઉપરવાળો હરિ તો સૌને સ્વીકારીને જ બેઠો છે. એની પાસે કોઈનો અસ્વીકાર છે જ નહી. હા, એની મરજી આપણા સુધી પહોંચે એ માટે આપણા મનના દરવાજા ઉઘાડા હોવા જોઈએ. સમજણની બારી વસાયેલી ન હોવી જોઈએ એ ખરું.   

હરિને જોવા માટે અંતરની આંખ જોઈએ. ચશ્મા કે લેન્સની શું જરૂર ? હા, અહીંયા એ મનમોહન વરતાય છે કેમ કે એને ઝળહળ પહેર્યા પછી વિકારો છૂટી જવાની વાત છે. વિકારો વિકાસનું પહેલું પગથિયું છે. પ્રાથમિક અવસ્થા છે. જેવો અખિલાઇનો રંગ લાગવા માંડે, નકામા વિકારોની તાકાત નથી કે એ ટકી શકે. એ છૂટવા જ માંડે. અંતિમ ઉપલબ્ધિ મળી ગયા પછી જીવનમાં કશું પામવાનું બાકી ન રહે. રહેવા જેવું રહે અને છૂટવા જેવું સઘળું છૂટી જાય.

આંખના આંસુ, એ ચાહે વિરહ ચાહે મિલન, અભિવ્યક્તિની ઉચ્ચતમ અવસ્થા છે. ભાવવિભોર મન આંખ વાટે વહી ઊઠે છે. હૃદયના ગહનતમ ભાવો બહાર આવવાનો એક રસ્તો જ જાણે છે અને એ છે આંખો. આમ જુઓ તો તમામ અભિવ્યક્તિ માટે માણસ પાસે આંખો એ જ સર્વોત્તમ સાધન છે. કોઇની પણ આંખ એના સમગ્ર વ્યક્તિત્વનો આયનો છે એમ કહેવામાં જરાય અતિશયોક્તિ નથી. સંત પુરુષની નિર્મળ આંખો માનવજાતને એના ચરણોમાં ઝુકાવી દે છે તો કામી કે જાલીમ માણસની આંખો જ એનાથી દૂર રહેવાના સંકેત આપે છે. અંદરના ભાવો બદલાય એમ આંખો પણ બદલાતી હોય છે.

બીજા અંતરામાં મનની અંતિમ છલકાતી અવસ્થાનું બયાન છે. મનની ગાગર ભરાઈ ગઈ છે. હવે હરિની કાંકરી લાગવાની વાર છે. ભાવ અવસ્થા ચિક્કાર છે. છલકાઇ જવાની, ઢોળાઈ જવાની ઇચ્છાના પૂર આવ્યા છે. હવે ઊડીને આવવા માટે પાંખો ફૂટી ગઇ છે. “નજર સામે હરિ તારું આકાશ છે, હાથ લંબાવ અને સ્વીકારી લે, સમાવી લે તારામાં …. આ અવતાર ધન્ય બની જાય…”
**

🙏 કવિઓના જન્મદિવસોનો વિભાગ ‘વિશેષ’ જોવા માટે મોબાઇલના સૌથી ઉપરના ભાગે જમણી બાજુ ત્રણ આડી લીટી દેખાશે એને ટચ કરતાં બધા વિભાગો જોવા મળશે. જે વિભાગ જોવો હોય એને ટચ કરો.🙏

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏કાવ્યવિશ્વ’માં કવિના નામથી, કાવ્યની પ્રથમ પંક્તિથી અને વિષયથી કાવ્ય કે લેખ શોધી શકાય છે જુઓ search🙏

🙏‘કાવ્યવિશ્વ’ના વોટ્સ એપ ગ્રૂપમાં આપ જોડાઈ શકો છો.🙏

**

મારી સ્કોટલેન્ડસફર