🔆અનિલ ચાવડા ~ મને સ્હેજે રહ્યો🔆

મને સ્હેજે રહ્યો જ નહીં ખ્યાલ
ઠૂંઠવતા જીવતરની ઉપર આવીને તમે
ઓઢાડો ચાદર કે વ્હાલ ?

ક્યારની કરું છું હું એવી રે અટકળ કે
મહેક્યાં છે પુષ્પો કે શ્વાસ ?
સ્હેજ કરી આંખો જ્યાં બંધ અમે ત્યાં તો સાવ
નાનકડું લાગ્યું આકાશ
ગાલ ઉપર ફરતું’તું પીંછું કે પીંછા પર ફરતા’તા ગાલ ?
મને સ્હેજે રહ્યો જ નહીં ખ્યાલ….

ક્યારે આવીને તમે પ્રગટાવી દીધો રે
છાતીના કોડિયામાં દીવો
સરબતની જેમ મારા હોઠ લગી આવીને
હળવેથી બોલ્યા કે ‘પીવો’ !
શરમે રતુંબડા છે ગાલ થયા મારા કે ઉડ્યો છે સઘળે ગુલાલ
મને સ્હેજે રહ્યો જ નહીં ખ્યાલ……….

~ અનિલ ચાવડા

દિવ્ય ભાસ્કર @ કાવ્યસેતુ 53 @ 18 સપ્ટેમ્બર 2012

*મીઠી મૂંઝવણ*

યુવાન અને સર્જકતાથી છલકાતા કવિઓમાંના એક અનિલ ચાવડા. સ્ત્રીની સંવેદનાને, સ્ત્રીની પ્રેમની કોમળ અનુભૂતિને એમણે અજબ રીતે સંવેદી છે ને શબ્દોમાં વહાવી છે ! આ સરસ મજાના ગીતના ઉપાડમાં રજૂ થયેલી સ્ત્રીની વિસ્મયાનુભૂતિ ભાવકને સ્પર્શી જાય છે. એકદમ વાતચીતનો લય અને સ્ત્રીના મુખમાંથી સહજ રીતે સર્યા કરતા શબ્દો, ‘મને સ્હેજે રહ્યો નહીં ખ્યાલ’ અને પછી ‘ઠૂંઠવતા જીવતરની ઉપર આવીને તમે ઓઢાડો ચાદર કે વ્હાલ !’ વાંચતાં જ જાણે પ્રિયતમના પ્રેમને ઝંખતી પ્રેમિકાના હૈયાને શાતા મળે એવી મજાની રજૂઆત !

પછીની પંક્તિઓમાં ઝાકળભીનાં ફૂલની એક પછી એક પાંખડીઓ જાણે ખુલતી જાય છે. સ્પર્શની આછેરી વાછટ શ્વાસમાં છલકાતી સુગંધ ભરી દે છે, ગાલ પર પ્રિયતમનો નાજુક સ્પર્શ પીંછા જેવો મુલાયમ ભાસે છે અને આ અસીમ સુખની અનુભૂતિ હૈયાને એવું તો સભર બનાવી દે છે કે આંખો બંધ કરતાં આખું આકાશ નાનકડું લાગે છે..

છાતીના કોડિયામાં દીવો પ્રગટાવવાનું કલ્પન પ્રેમની અનુભૂત ક્ષણોની આબાદ કોતરણી છે તો ‘સરબતની જેમ મારા હોઠ લગી આવીને હળવેથી બોલ્યા કે પીવો !’ પંક્તિમાં રોમાન્સ અત્યંત નાજુકાઇથી સોળે કળાએ ખીલ્યો છે. ‘દીવો’’ અને ‘પીવો’ પ્રાસની સહજ અને સ્વાભાવિક ગુંથણી સાથે આખીયે પંક્તિનું ભાવઝરણ એટલું તો મધુર લાગે છે કે ભાવકનું મન ગુલાલ ગુલાલ થઇ જાય !

કાવ્યના શબ્દે શબ્દમાંથી પ્રેમની ભીનાશનો નમણો ગુલમહોર કોળી ઉઠે છે, મ્હોરી ઉઠે છે.. કલ્પનો અને શબ્દોની પસંદગી એવી નજાકતથી ભરી ભરી છે કે આ કાવ્ય કોઇ પુરુષે લખ્યું છે એ માનવા જલ્દીથી મન તૈયાર ન થાય અને આ જ તો આ કાવ્યની ખૂબી છે. પ્રેમના અદભુત અનુભવથી ચકિત થયેલી અને છલકાયેલી સ્ત્રી આમાં વહે છે, બેય કાંઠે…

કાવ્યના તમામ પ્રકારોમાં લય તો સમાયેલો જ હોય છે. અછાંદસ કાવ્યમાં એ છુપાયેલો હોય. કેળવાયેલો કાન એને પકડી શકે. અલબત્ત એનું પઠન કેવું છે એના પર આધાર રાખે. વાંચનમાં જેવી ભાવકની સજ્જતા. ગઝલ તો લય વગર સંભવે જ નહી અને ગીતમાં લય એનો પ્રાણ કહી શકાય. કાનમાં રણકતા ઝાંઝર જેવો ગીતનો લય ક્યારેક શબ્દોને પણ વિસારે પાડી શકે છે. અહીં લય અને ભાવમય શબ્દો, બંને એની ચરમ ઊંચાઈએ પહોંચ્યા છે.
**

🌸દિન વિશેષ : ગુણવંત ઉપાધ્યાય, સુરેશ ઝવેરી, ગૌરવ રાવલ ‘વિદીશ🌸   

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

🙏 કવિઓના જન્મદિવસોનો વિભાગ ‘વિશેષ’ આપ ગમે ત્યારે જોઈ શકો છો. like, પ્રતિભાવ પણ આપી શકો છો.🙏

🙏કાવ્યવિશ્વ’માં કવિના નામથી, કાવ્યની પ્રથમ પંક્તિથી અને વિષયથી કાવ્ય કે લેખ શોધી શકાય છે જુઓ search🙏

🙏‘કાવ્યવિશ્વ’ના વોટ્સ એપ ગ્રૂપમાં આપ જોડાઈ શકો છો.🙏

**

અમ્મા