🔆રમેશ દરજી ~ વગડાની ધૂળ🔆

*મારા વગડાની વાત*

વગડાની ધૂળ મારી આંખોમાં આંજીને
ભૂલી જાઉં છું મારી જાત રે,
આંબલી ને પીપળી જ્યાં રમતા તાં ત્યાં જ ગઈ
ઊંધે રે માથે આ ઘાત રે !

ખેતર તો ચમકે છે એવા કઈ જાણે રે
ડૂંડામાં ચમકે રે મોતી
ખેતરના થાળામાં ઠલવાતા કોશ જેમ
મારી તો જાત એમ ખોતી.
ચાલીને આવે છે મારી સાથે જ મેં
પાડેલી પગલાની ભાત રે …… વગડાની

વરસોથી ફળતા ના કોઈ વ્રત ગોરો કે
ના કોઈ સુતરના દોરા
ઓળખવા કેમ હવે લોકો જે પહેરીને
બેઠા છે જીવતરમાં મ્હોરા ?
ઝૂંપડીમાં ગરકેલા કાળોતરા જેમ હવે
વીતે છે મારી તો રાત રે …. વગડાની .

~ રમેશ દરજી

દિવ્ય ભાસ્કર @ કાવ્યસેતુ 305 @ 7 નવેમ્બર 2017 * લતા હિરાણી

માણસ સાથે સહજ રીતે સંબંધાયેલા સઘળા પ્રકૃતિતત્વો શું એના સુખદુખથી અલિપ્ત રહી શકતા હશે ? માણસની વેદનાથી એનેય કંઈ થતું નહી હોય ? વગડો, ખેતર, ખેતરમાં આવેલી નાનકડી ઝૂંપડી એક સ્ત્રીના જીવનની આસપાસ વીંટળાયેલા છે. એ સ્ત્રીને દેખાય છે વગડાની ઊડતી ધૂળ. ત્યાં બીજું પણ હશે, હોય જ પણ સ્વાભાવિક છે કે જેવું મન એવી મૂરત. હૈયામાં એકલતાની ધૂળ ઊડતી હોય ત્યારે આંખ સામેનું લીલુંછમ ઝાડ પણ ઝાંખરું લાગે ! એકલતા અનેક પ્રકારની હોય છે. ક્યાંક સાથ છૂટયાની એકલતા ને ક્યાંક સાથ હોવા છતાંય અણસમજની, અભાવની ને અધુરપની એકલતા. એકલતા ચીજ જ એવી છે કે અંદર અંદર માણસને કોરી ખાય. ન કહેવાય, ન સહેવાય. બીજાની દૃષ્ટિએ એની બહારની, આજુબાજુની સભરતા – એટલે કે એને વીંટળાયેલ સમૃદ્ધિ, સગવડતા, પ્રવૃતિ પર્યાપ્ત હોય પણ એકલા પડી ગયેલા માનવીને ખબર હોય કે ક્યારેક ઘડિયાળનો કાંટો કેવો છાતીમાં ભોકાતો હોય !

અહી એક સ્ત્રીની વાત છે. સાથ સંગાથથી વંચિત રહ્યાની એની વેદના કોશના પાણીની જેમ કૂવાના થાળામાં ઠલવાય છે. ખેતર પાદર એના સાક્ષી છે. વગડાની કોરી સૂકકી ધૂળ એની આંખોમાં નિરંતર ભેજ ઠાલવે છે ને કૂવાના થાળામાં ઠલવાતું પાણી એની લાંબી વેરાન જિંદગીને ઠાલવે છે. આંબલી પીપળી રમવાના દિવસોની યાદોની મધુરતા આ એકલતાએ ક્યારની છીનવી લીધી છે. વ્રત, ગોરો કે એવું કઈ જીંદગીમાં ફળ્યું નથી ને હવે એના ઉના નિસાસા ચારેકોર ઊડે છે. આખુંય ગીત એકલતાની પીડા છલકાવે છે ત્યાં ખેતરમાં ડુંડામાં બેઠેલા દાણા નાયિકાને મોતી જેવા લાગે છે તો એનો અર્થ ‘એની આંખોમાં ચળકતા આંસુના મોતી’ જ થાય ને ! બાકી “ચાલીને આવે છે મારી સાથે જ મેં પાડેલી પગલાની ભાત રે… “ એકલતાને વર્ણવતી આ પંક્તિઓમાંનું  કલ્પન અત્યંત ચોટદાર છે…. 

🌸દિન વિશેષ : મિલિન્દ ગઢવી, સંદીપ ભાટીયા, જગન્નાથ રાજગુરુ ‘ઈશાન’, હુસૈન ગાહા ‘હુસૈન’, હરીહર ભટ્ટ🌸

🙏આપની પસંદના કવિ કોણ છે? ‘Search’માં એમનું નામ લખો! વાંચો એમની કવિતાઓ ! એમાં આપ પોતે પણ હોઈ શકો. 🙏

🙏 કવિઓના જન્મદિવસોનો વિભાગ ‘વિશેષ’ આપ ગમે ત્યારે જોઈ શકો છો. like, પ્રતિભાવ પણ આપી શકો છો.🙏

તમને ડાયાબિટિસ હોય કે ન હોય, આ જરૂર વાંચો