🔆ભાવિન ગોપાણી ~ નજર જ્યાં🔆

નજર જ્યાં પડે ત્યાં ધુમાડો ધુમાડો
છે મંજિલ ધુમાડો ને રસ્તો ધુમાડો

હું સામે ઊભો રહી મને જોવા ઝંખું
બતાવે હમેંશા અરીસો, ધુમાડો

કિનારાના અસ્તિત્વનો શું ભરોસો?
ગમે ત્યારે થઈ જાય દરિયો, ધુમાડો

ભલે સૌએ ધુમ્મસ કહી માન આપ્યું
મને માત્ર લાગ્યો એ ભીનો ધુમાડો

ફરે મંચ પર એ કલાકારની જેમ
ને ક્યારેક થઈ જાય પડદો, ધુમાડો

ભલે કાળો-ધોળો નજર આવતો હોય
મળે ભીતરે લાલ-પીળો ધુમાડો

પ્રતીક્ષામાં કોઈ ઊભું હોય જાણે
ગગન પાર કરવા અધીરો ધુમાડો

અચાનક ફિકર થાય પર્યાવરણની
અચાનક બની જાય મુદ્દો, ધુમાડો

થયેલાં મરણનું જો કારણ તપાસો
રહે આગથી વેંત ઊંચો ધુમાડો

~ ભાવિન ગોપાણી

ધુમાડા જેવા અલગ વિષય પર લખાયેલી ગઝલ. આવો વિષય સૂઝવો એ સરસ વાત. 

ધુમાડાને શું કહીશું? માણસનું જીવન ? જીવનનો અર્થ ધુમાડો ? કદાચ એવું જ.

એટલે જ નાયકને ચારેબાજુ ધુમાડો દેખાય છે. મંઝિલ જ અસ્પષ્ટ હોય તો રસ્તો ક્યાંથી સાફ દેખાય ? અંદર સુધી પહોંચવાની હજી પહોંચ ન આવી હોય તો અરીસો ચહેરાને ઓઝલ કરી શકે.

પ્રકૃતિ નથી દયાળુ, નથી ક્રૂર, એ એના નિયમ પ્રમાણે ચાલે છે. એ ડૂબાડી શકે, તારી શકે. ભીતરના ધુમાડાને લાલ-પીળો કહીને કવિને માનવીના વસ્ત્રો ઉતારી લીધા છે. અંદરની કુરૂપતાને ઉઘાડી છે. 

અંતિમ શેર ખૂબ માર્મિક. ‘થયેલાં મરણનું જો કારણ તપાસો, રહે આગથી વેંત ઊંચો ધુમાડો’ ભલે આપણે માનીએ કે મોત એના સમયે આવે છે. કારણો નિમિત્ત છે, શ્વાસ જેટલા લખ્યા હોય એટલા જ મળે, વગેરે

ઘડપણનાં મરણને બાદ કરતાં પણ મરણનાં કારણો તપાસો તો અણસમજ, નાદાની, બેવકૂફી, ખોટી માન્યતાઓ અને કંઈ કેટલુંય…. સરવાળે ધુમાડો, સમજણનો અભાવ…..  

🌸આજે જન્મદિન: હસમુખ પટેલ ‘શૂન્યમ’, રાજેશ પ્રજાપતિ🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏

આપને આ વાંચવું ગમશે.

પાકટ ઉંમરે ડ્રાઇવીંગ શીખવાના પાકા નિયમો