🔆રક્ષા શુક્લ ~ ફાટી ‘ગ્યા છે🔆

ફાટી ‘ગ્યા છે તારીખિયાનાં સઘળાં પાના,
નવા હર્ષના આવી ‘ગ્યા છે નવલાં બ્હાના.

બ્હાનાઓ તો પતંગિયાની પાંખો જાણે,
ઊડઊડ થાતા રંગ પાથરે અવસર ટાણે.
ઊંબર ઊછળી કોના આ પગલાં પીછાણે ?
હરખે ઉત્તર દઈ સાથિયા મેળો માણે.
કંકુ થાપામાંથી ચોઘડિયાં ઝરવાના ….. નવા હર્ષના

તોરણથી સરકી આવી ટહુકાની વાણી,
રંગોને લ્યો, વૃક્ષોની ભાષા સમજાણી.
રિધ્ધિ સિધ્ધિ આવી કરતી, ધનની લ્હાણી,
દુંદાળા એ દેવ થતાં ત્યાં પાણી પાણી .
તળિયે મુકો તાપ, કલેજાઓ ઠરવાના…… નવા હર્ષના

દિવસે દીવા અજવાળાનો અક્ષર ઘૂંટે,
સાંજ પડે ઘરઘર વ્હેંચ્યાનો લ્હાવો લૂંટે 
આંખોનો આકાર તજીને સપનાં છૂટે,
ઘાટ પામવા ભાવિ ઘટનાને એ ચૂંટે.
દીપાવલીથી દિવસો આ સઘળાં ફરવાના, 
નવા હર્ષના આવી ‘ગ્યા છે નવલાં બ્હાના……

~ રક્ષા શુક્લ

દિવ્ય ભાસ્કર @ કાવ્યસેતુ 303 @ 24 ઓક્ટોબર 2017 * લતા હિરાણી

માનવીને જન્મ શા માટે મળ્યો છે ? એક જ ઉત્તર, ખુશ થવા, સુખી થવા. માનવજન્મનું સાફલ્ય ખુશ રહેવામાં છે. જો ‘આનંદ’ વ્યાપેલો રહે તો ઓર બાત પણ ખુશીના સ્તર પર રહેવું એય નાનીસુની સિદ્ધિ નથી. અન્યની ખુશીનો વિચાર કરતાં રહેવાથી આપોઆપ પોતાની ખુશી મળી જાય પણ એ થોડી અઘરી વાત. જવા દો આ બધી ફિલસૂફી. આપણે તો બસ મજામજાની વાત કરીએ.

કેલેન્ડરના દટ્ટા હવે જોવા મળતા નથી. પણ પહેલાં તારીખીયા આવતા. રોજનું એક નાનકડું પાનું. તારીખ બદલાય એટલે સવારમાં ફાડી નાખવાનું. એ રદ્દી જેવા તારીખિયાના નીકળેલા પાનાનો દાઢીનો અસ્ત્રો લૂછવા થતો ઉપયોગ અમે જોયો છે. કશું એમ જ ફેંકી ન દેવું એ ફરીને શીખવા જેવી બાબત છે !  નવા વર્ષે લેવાતા સંકલ્પોમાં આ એક લેવા જેવો ખરો કે ‘કશાનોય બગાડ નહીં કરીએ’.

વાત ચાલતી હતી કે ખુશ થવા માટે આપણે રોજેરોજ કારણ જોઈએ છે. કૈંક બહાનું જોઈએ જેથી મજા આવે, કશુંક સેલીબ્રેટ કરી શકાય. ‘પાર્ટી હો જાયે’…. એય મજાનું છે. રૂટિન લાઈફ બોરીંગ લાગવા માંડે એ પહેલાં ખુશ થવાનું એકાદ બહાનું શોધી કાઢવાનું…

નવા વર્ષે નવાં કપડાં પહેરીને ઉછળતા બાળકો પતંગિયાની રંગબેરંગી પાંખો સજેલા લાગે. લક્ષ્મીનો વાસ થાય એવું તો મુફલિસ પણ ઇચ્છે અને શુભ ચોઘડિયા જોઈ એને દર વર્ષે આવકારે. વાત ભાવનાની છે. વૃક્ષો અવસરને વધાવતા એના પાંદડાઓ સાથે ટહૂકાઓ પણ પરોવીને આપે છે. બારસાખે ઝૂલતા આ તોરણ અંદર બહાર ખુશી ઝુલાવે છે. ઉંબરનો સાથિયો અને આંગણાની રંગોળી આંખને ઠારે છે. રંગોની લિપી ઉકેલવી નથી પડતી. પાંપણ એની ભાષા જાણે છે. આંગળીઓની એ કલા આવકારને પ્રગટાવે છે. સાંજ પડ્યે અભણ અંધારાને અજવાળાનો અક્ષર શીખવતા દીવાઓ દિલમાં રોશની પ્રગટાવી જાય છે.    

વહેલી સવારમાં જ મંદિરે દર્શન કરવા જવાનું અને પછી વડીલોને પગે લાગવા જવાની પ્રથામાં ફેરફાર થયો છે. હવે બેસતા વર્ષના દિવસે બહુ વહેલા ઉઠવાની ઝંઝટ શહેરી લોકો કરતાં નથી. આરામથી મંદિરે જાય છે અને વડીલોના લિસ્ટ ટૂંકા થતાં જાય છે. ફોન કરી લેવાથી કામ પૂરું થાય છે. વોટ્સ એપ અને ફેસબુકથી તો દુનિયાભરને વિશ કરી શકાય પણ હજી મોટો વર્ગ છે જેને ‘સાલમુબારક’ કહેવું રોમાંચક લાગે છે. ‘હેપી ન્યુ યર’ ચાલે પણ એના માટે પહેલી જાન્યુઆરી ઠીક છે. સૌને પગે લાગવાનો કાર્યક્રમ પૂરો થાય પછી આશીર્વાદની રોકડ ગણવા બેસવાની ને એને કેમ વાપરીશું, એમાંથી શું શું લઈશું એ પ્લાન કરવાની બાળકોની ખુશી ગજજબ હોય છે. બીજા કોઈ લક્ષ્મીવાન થાય કે ન થાય પણ બાળકો તો નવા વર્ષે જરૂર ધનવાન બની જાય છે… અલબત્ત હવે પ્રથાઓ બદલાતી જાય છે પણ તોય હજી ખુશ થવાના ઘણા કારણો છે એટલું સાચું ! 

🌸આજે જન્મદિન: સંગીતા મોદી, માધવ રામાનુજ, મહેન્દ્ર પંડ્યા🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏