🔆ઉર્વીશ વસાવડા ~ શબ્દ મધ્યે🔆

શબ્દ મધ્યે સ્વર્ગ છે, સમજાય તો,
એ જ એનો અર્થ છે, સમજાય તો.

પ્રશ્ન છે તો ઉત્તરો એના હશે,
સાવ સીધો તર્ક છે, સમજાય તો.

કોઈ ના બોલે છતાં સહુ સાંભળે,
એ જ સાચું પર્વ છે, સમજાય તો.

માનવી ને માનવી ગણવો ફકત,
એ ખરેખર ધર્મ છે, સમજાય તો.

અ કલમ પર છે નિયંત્રણ કોકનું,
ને મને એ ગર્વ છે, સમજાય તો.

પુષ્પને સ્પર્શ્યા વિના પણ પામીએ,
દોસ્ત ઉત્તમ અર્ક છે, સમજાય તો.

~ ઉર્વીશ વસાવડા

‘સમજાય તો’ રદ્દીફ કેટલો અર્થપૂર્ણ છે! ‘સમજ’, ‘સમજણ’ જે માનવીમાં હોવી ઘટે એ જ શોધવી પડે એમ છે.

સમજ એવી ચીજ છે જે બહુ ઓછી જોવા મળે છે અને તમામ સમસ્યાનું મૂળ ત્યાં છે. સમાજની કોઈપણ સમસ્યા જુઓ તો સમજણનો અભાવ તરત ઊડીને આંખે વળગશે, અલબત્ત જેનામાં સમજ હશે એને જ.

આજના સમયમાં આ શેર અત્યંત સૂચક છે,

‘માનવી ને માનવી ગણવો ફકત, એ ખરેખર ધર્મ છે, સમજાય તો.’

ચારે બાજુ ધર્મના નામે જે અત્યંત હીન પ્રવૃત્તિઓ ચાલી રહી છે, મારો સંપ્રદાય જ સાચો અને મોટો એવા વિચારે એકબીજા સામે જે કાદવ ઉછાળ થઈ રહ્યો છે ત્યારે કોને કોણ સમજાવે કે ‘માનવધર્મ’ એ સૌથી મોટો છે….

ધર્મ એ દરેકની પોતાની વ્યક્તિગત બાબત છે એના માટે જે કરવું હોય એ ઘરની અંદર જ રહે…. બહાર જે હોય એ માત્ર ને માત્ર માનવધર્મ અને બીજું કશું નહીં એવું સ્વપ્ન સેવવા અને સાકાર કરવાની ખૂબ જરૂર છે.  

**

🌸આજે જન્મદિન: અલકા શાહ🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏