🔆વંચિત કુકમાવાળા ~ નજરું આપો🔆

નજરું આપો સાંઈજી
મારા રે પંડના પરકાશે લીધી પરથમ રે અંગડાઈ જી

ઝીલે ટેરવડાંની ધારું ઝીલે નભ આખાનો ભાર
રણકે રગરગથી રણકે છે કોઈ વાજીંતરના તાર
આસન આપો સાંઈજી
આ હાથવગી પળની પછવાડે ઊભી રે અખિલાઈ જી
નજરું આપો સાંઈજી…

માણે હાલકડોલક મનડું માણે અનહદના અણસારા
છૂટે રઘવાયાં તળિયેથી છૂટે અલલલ લીલી ધારા
લેખણ આપો સાંઈજી
એક નોખો શબદ ઉતારી કરવી ભવભવની ભરપાઈ જી
નજરું આપો સાંઈજી…

~ વંચિત કુકમાવાલા

અનહદના અણસારા જેનામાં પ્રવેશી ચૂક્યા છે અને આ સંસારમાં થતું હલકડોલક મનડું હવે આગળ ધપવા થનગને છે એ ઘડીને, એ સમયને શબ્દોમાં પરોવતું ગીત….. વાત અધ્યાત્મની છે પણ આને ભજન નહીં કહી શકાય. આ કોઈક ચેતના જાગી ગયેલી પળનું ગાન છે. અને ઉત્તમ કાવ્યત્વને પ્રમાણતું આ ગીત છે.  

‘ઝીલે ટેરવડાંની ધારું ઝીલે નભ આખાનો ભાર’ ટેરવેથી જાણે ચૈતન્યની વીજળી સડસડાટ પાર ઉતરી ગઈ હોય એમ ભાવકને પણ અનુભવાય છે.  તો ‘આ હાથવગી પળની પછવાડે ઊભી રે અખિલાઈ જી’ વાંચીને ઓવારી જવાય. સાધકો અને ખાસ સમજ ધરાવતા કાવ્યપ્રેમીઓ માટે અજવાળાં પાથરી દેતું આ ગીત છે.    

🌸આજે જન્મદિન: અલકા શાહ🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં મનપસંદ કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏