🔆દેવિકા ધ્રુવ ~ ધરતી લીલી🔆

ધરતી લીલી સાહેલી ને સૂરજ તો જગ સાજન,
કોમળ કૂણો તડકો વીંટે અંગ અંગ મનભાવન.

નૂતન ફૂટતી કળીઓ આણે મનમાં થનગન ફાગણ,
વાયુ લાવે સંદેશાઓ વાદળ જાણે વ્હાલમ.

ઉંચા અદકા પરવત ભરતા ચિંતનની કો’ ગાગર,
તળિયે ખળખળ વ્હેતા ઝરણાં લાગે પગના ઝાંઝર.

નીર નદીના નિર્મલ રાખે અંતરતલને પાવન
પંખી મધુરા ગીતો ગાતાં તરુવર જાણે પાગલ.

તેજ સમેટી સૂર્ય સૂવાડે દઈને શ્યામલ ચાદર,
પરમ શાંતિ શિર પર જ્યારે ટમકે ટમટમ તારક.

ચાંદ રેશમી રાતની સાથે કરતો કુમળા કામણ,
આભ ઝળુંબી ચુમે ધરાને, દરપણ જાણે સાગર.

મૌન કુદરત કહે શબ્દને; નિયતિ આવન-જાવન,
રૌદ્ર-રમ્ય, કરાલ કોમલ, સઘળું ઝીલશે માનવ?

~ દેવિકા ધ્રુવ

વાત કુદરતની છે, કુદરતના જુદાં જુદાં રૂપોની છે. જીવનની છે અને જીવનના કુદરત સાથે સુંદર રીતે સંકળાવાની છે. આમ આખુંય કાવ્ય એક સૂરમાં સુગંધ ભરીને વહ્યે જાય છે એટલે ગમી જાય છે…..

**

🙏 મિત્રો, આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં પસંદના કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏