🔆દિનેશ ડોંગરે ~ તમારી આંખ ઝૂકી🔆

તમારી આંખ ઝૂકી તો ઝૂકીને સહી કરી દીધી,
અમે અસ્તિત્વને ગીરવે મૂકીને સહી કરી દીધી.

પ્રણય, આઘાત, અકળામણ, રૂદન ગુસ્સો અને ઉચાટ,
અભેરાઈ ઉપર સઘળું મૂકીને સહી કરી દીધી.

હશે એ કેવી મજબૂરી? તમે પણ કલ્પના કરજો,
અમે પોતે જ પોતાથી રૂઠીને સહી કરી દીધી.

હવે ફરિયાદ કોને, કંઈ રીતે કરશું કહો‌ મિત્રો?
અમે જાતે જ જ્યારે ઘર ફૂંકીને સહી કરી દીધી.

થયું છે કંઇક ચિતરામણ હૃદયની કોરી પાટી પર,
બધુંયે અંતતોગત્વા ભૂંસીને સહી કરી દીધી.

સહ્યું છે જેમ સહેવાયું, જીવ્યા છે જેમ જીવાયું,
અનુત્તર પ્રશ્ન ઈશ્વરને પૂછીને સહી કરી દીધી.

ઘણીયે બાંધછોડો ને સમાધાનો કરી જોયાં,
પછી એની સભામાંથી ઉઠીને સહી કરી દીધી.

હૃદયની વણકહી પીડા નીતરતી જોઈને ‘નાદાન’
તરત આંખોથી અશ્રુઓ લૂછીને સહી કરી દીધી.

~ દિનેશ ડોંગરે ‘નાદાન‘

કવિનું નિવેદન ~ મારી બહુતાંશ ગઝલો અનુભૂતિમાંથી સર્જાયેલી છે. ઉપરોક્ત ગઝલ પણ મારા વકીલાતના વ્યવસાયમાં આવેલ કેસની ઘટના ઉપર આધારિત છે. વકીલાતના વ્યવસાયમાં સૌથી પીડાદાયક અને જટિલ કેસ છુટાછેડાનો હોય છે. લગ્ન જીવનમાં વરસો સુધી એકસાથે રહ્યા પછી જ્યારે કોઈ યુગલ  છુટાછેડાના નિર્ણય પર આવે છે ત્યારે એમની અને કેસ સાથે સંકળાયેલા લોકોની શું મનઃસ્થિતિ હોય છે એનો આબેહૂબ ચિતાર આ ગઝલમાં સાદ્રશ્ય થયો છે.

એક આધેડ દંપતી બે દાયકા, બે બાળકો સહિત સુખી ‌દાંપત્ય જીવન પછી એક પાત્ર દ્વારા નાજુક પળે થઈ ગયેલ ભૂલ અને એના કારણે દાંપત્યજીવનમાં સર્જાયેલ અવિશ્વાસની ખાઈ, કટુતા, કંકાસ કારણે નછૂટકે છુટાછેડાના કઠિન અનિવાર્ય નિર્ણય ઉપર આવે છે. એક વકીલની નૈતિક સામાજિક ફરજના ભાગરૂપે બંને પાત્રોને ભૂતકાળ ભૂલી એકમેકને ઉદારતાથી માફ કરી નવેસરથી જીવન જીવવા સમજાવવાના તમામ પ્રયત્ન નિષ્ફળ જાય અને અંતે કેસ છુટાછેડામાં ‌પરિણમે તે સમયે ઉભયપક્ષને થતી અવઢવ તેમજ વેદના આ‌ ગઝલમાં ઝિલાઈ છે. ~ દિનેશ ડોંગરે ‘નાદાન‘

**

🌸આજે જન્મદિન: જિગર જોશી, શ્યામલ મુનશી, ગૌતમ રાઠોડ🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં પસંદના કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏