🔆જિગર જોષી ~ તું નહીં આપે🔆

તું નહીં આપે ભલે ઘાવ, ઉઝરડા તો દે,
આંસુ પણ લઈ લે, મને ખાલી તું રોવા તો દે.

જિંદગી! શેની ઉતાવળ છે, જરા કહે તો ખરી;
સામે બેસાડી તને મન ભરી જોવા તો દે!

તું કહે એવી રીતે હું પછી ઊભો થાઉં,
મારે પડવું છે એ રીતે મને પડવા તો દે.

તક જવલ્લે જ મળે છે તો આ તક તું વાપર,
આંખને આંસુ કોઈ વાર ખરચવા તો દે.

રાખ થૈ જાશે ઘડીભરમાં સ્મરણ પણ તારાં,
હૈયું સળગ્યું છે, જરા આગ પકડવા તો દે.

~ જિગર જોષી ‘પ્રેમ’

વાત પોતાના પ્રિયપાત્રને માટે છે. એ જ પ્રેમ અને પીડા પણ દરેક શેરમાં જે કથનતત્ત્વ છે, જે વાતો છે, એ સામાન્ય લાગે છતાં કેટલી અસામાન્ય છે! રદ્દીફ ‘તો દે’ – માત્ર બે જ શબ્દો અને તેય એક એક અક્ષરના પણ જુઓ, એ કેટલા વજનદાર છે! આખી ગઝલને આ એક એક અક્ષરના બે શબ્દો પોતાના ખભે ઉપાડી લે છે. સામેની વ્યક્તિ સ્તબ્ધ બની જાય, દિશાશૂન્ય બની જાય એ હદે આ શબ્દો કામ કરી જાય છે. સલામ કવિ!  

**

🌸આજે જન્મદિન: સ્નેહરશ્મિ, આરતીબા ગોહિલ, મધુ કોઠારી🌸

🙏 આપનો જન્મદિન (વિભાગ વિશેષ) પણ ‘કાવ્યવિશ્વ’માં સમાવિષ્ટ છે. આપનું નામ લખો, ‘search’ માં, પોસ્ટ હાજર!🙏

🙏’કાવ્યવિશ્વ’માં પસંદના કવિની કવિતા મળી શકે છે, કવિનું નામ લખો ‘search’ માં, પોસ્ટ હાજર! 🙏