🔆પારુલ ખખ્ખર ~ શરમ છોડી🔆 -

*દરિયો*

શરમ છોડી ઉઘાડેછોગ ભેટી જાય છે દરિયો
જરા શી આંખ મિંચકારી પછી મલકાય છે દરિયો.

અઘોરી જેમ ખિસ્સામાં રહેલી રેત ધૂણે ને,
બની સાંકળ ત્વચા પર તે પછી વિંઝાય છે દરિયો.

કિનારા પર પ્રથમ તો એક પગલું આળખે પોતે,
પછી મોજાં ભરેલી આંખમાં વંચાય છે દરિયો.

ફકત ઘુઘવાટ પર મુસ્તાક રહેવાની કળા જાણે,
નથી સંગીત આવડતું છતાં યે ગાય છે દરિયો.

સ્વયંની બીન પર નાચે નદી એવા જમાનામાં,
પછાડે ફેણ, ઓકે ઝેર ને વળ ખાય છે દરિયો.

ખરીદો છીપ, મોતીમાં ખરીદો શંખ,કોડીમાં,
અહીં બેચાર પૈસામાં જુઓ વેચાય છે દરિયો.

ઘણાં વર્ષો પછી એ પગ ઝબોળ્યાંનું સ્મરણ આવ્યું,
રગોમાં પગ પ્રસારી ત્યારથી ફેલાય છે દરિયો.

~ પારુલ ખખ્ખર

આજે વિશ્વ સમુદ્રદિન * જય હો દરિયા દેવ

કાવ્યમાં દરિયાનું વ્યક્તિકરણ અજબ થયું છે! ભાવકની આંખ સામે ઊઘડે છે દરિયો ! ઘૂઘવતો, ફેણો પછાડતો, નાચતો ને વળ ખાતો અને રગેરગમાં ઘોડાપૂરે પ્રસરતો દરિયો જાણે એક પ્રચંડ માનવી જ ! હા, આ દરિયો છે, મહામાનવ છે એટલે એમાં ઝીણી, નાજુક બાબતોને સ્થાન ક્યાંથી હોય?

અલબત્ત સાવ ઝીણી માછલીઓને સાચવતો કે શેવાળને પણ પંપાળે એય દરિયો છે જ.

પણ કવિને અહીં એનું એક ધરખમ ધમધમતું વ્યક્તિત્વ દર્શાવવું છે, એ જ એનો ઇરાદો છે અને આ કવિ પોતાના ઈરાદામાં સફળ ન થાય તો જ નવાઈ !

🙏આજનો દિનવિશેષ : નલિની માડગાંવકર – ગોવિંદ ગઢવી, ધનસુખલાલ પારેખ, *ખલીલ ધનતેજવી (*અવસાન તારીખ)🙏

🙏 નોંધ: કવિઓના જન્મદિવસોનો વિભાગ ‘વિશેષ’ ‘કાવ્યવિશ્વ’ પર આપ ગમે ત્યારે જોઈ શકો છો. like, પ્રતિભાવ પણ આપી શકો છો. આભાર. આપના નામથી ‘search’ આપો, હાજર.🙏

🙏કાવ્યવિશ્વ’માં કવિના નામથી, કાવ્યની પ્રથમ પંક્તિથી અને વિષયથી કાવ્ય કે લેખ શોધી શકાય છે જુઓ search, હાજર.🙏

🙏સૂચના પ્રમાણે કશું ના મળે તો જાણ કરવા વિનંતી. 🙏