🔆વિપિન પરીખ ~ તું અમેરિકન પત્નીની🔆 -

*આવતે ભવે*

આવતે ભવે

તું અમેરિકન પત્નીની જેમ
મને છોડીને ચાલી તો ન ગઈ
તેં મને
અનેક મનુષ્યોની વચ્ચે
વકીલોના સહારે
કોર્ટમાં બદનામ પણ ન કર્યો
ન તો ક્યારેય આક્રોશ કર્યો
ન ફરિયાદ કરી
માત્ર એક દિવસ વાતવાતમાં
તું આટલું બોલી ગઈ –
‘આવતા ભવે પતિ તરીકે તમે તો નહીં જ !’

~ વિપિન પરીખ

જે પેઢી હવે મધ્યમ વય વટાવી ગઈ છે એની વાસ્તવિકતા રજૂ કરતું કાવ્ય.

આજની યુવા પેઢીમાં પણ આવું હોવાની શક્યતા ઘણી છે. લોકોના માનસ હજુ એટલાં બદલાયાં નથી પરંતુ પરિવર્તનનો વાયરો ઘણો ફૂંકાઈ ગયો છે એ તો સ્વીકારવું પડે!